նախընտրելի դարձնելՀայաստանի պաշտպանության նախարարությունը հայտարարում է, որ սեպտեմբերի 17-ին ադրբեջանական մի շարք լրատվամիջոցների հրապարակած եւ Youtube ցանցում տարածված՝ իբր թե հայկական դիվերսիոն խմբի անդամներից մեկի` Մ.Սարիբեկյանի հետ անցկացված հարցազրույցի տեսագրության մեջ հնչած տեղեկատվությունը չի համապատասխանում իրականությանը:
ՊՆ մամուլի ծառայությունից NEWS.am-ին հայտնում են, որ Մ.Սարիբեկյանը այս տարվա մայիսին ավարտել է զինվորական ծառայությունը ՀՀ զինված ուժերում եւ ՀՀ հատուկ ծառայությունների հետ որեւէ կապ չունի: Կորած անասուններին որոնելիս մոլորված հովվին որպես դիվերսանտ ներկայացնելը ադրբեջանական քարոզչամեքենայի հերթական պարզունակ քայլն է: Տեսանյութի մասնագիտական փորձաքննությունը թույլ է տալիս եզրակացնել, որ այն իրականացվել է հոգեբանական ու ֆիզիկական ճնշման եւ հատուկ միջոցների կիրառման ներքո:
Ադրբեջանի իշխանությունների հերթական ապատեղեկատվությունը նպատակ ունի ապակայունացնել իրավիճակը շփման գծում, մոլորության մեջ գցել միջազգային հանրությանն ու սեփական հասարակությանը` կոծկելով ադրբեջանական կողմից պարբերաբար իրականացվող ռազմական հանցագործությունները, այդ թվում` դիվերսիոն գործողությունների տապալված փորձերը:
Ակնհայտ քարոզչական նպատակներով օգտագործելով այդ տեսանյութը` ադրբեջանական կողմն այս քայլով հերթական անգամ կոպտորեն խախտել է Միջազգային իրավունքի հանրաճանաչ նորմերը, մասնավորապես, «Մարդու իրավունքների եւ հիմնարար ազատությունների մասին Եվրոպական կոնվենցիայի» 6-րդ հոդվածը, «Քաղաքացիական եւ քաղաքական իրավունքների մասին միջազգային դաշնագրի» 14-րդ հոդվածը, «Մարդու իրավունքների համընդհանուր հռչակագրի» 11-րդ հոդվածը եւ այլն:
Հրավիրում ենք միջազգային կազմակերպությունների, մասնավորապես՝ Եվրոպայում անվտանգության եւ համագործակցության կազմակերպության, Կարմիր խաչի միջազգային կոմիտեի ուշադրությունը Ադրբեջանի իշխանությունների նմանատիպ գործողությունների վրա:
Մ.Սարիբեկյանի ծնողների` ԿԽՄԿ-ին ուղղված համապատասխան դիմումին զուգահեռ նման տեսանյութերի հրապարակումը խոսում է միջազգային իրավունքի նորմերի նկատմամբ ադրբեջանական իշխանությունների արհամարհական վերաբերմունքի մասին եւ կասկածի տակ է դնում համապատասխան միջազգային կազմակերպությունների կողմից դրանց կիրառման արդյունավետությունը:
ՀՀ պաշտպանության նախարարությունն ակնկալում է այդ կառույցների համապատասխան գործողությունները՝ Ադրբեջանի կողմից նման քայլերը կանխելու համար:
