նախընտրելի դարձնել
Փետրվարի 18-ին Վանաձորում ծնված եռյակ տղաներին՝ Արմանին, Արենին ու Արտյոմին ծննդատնից դուրս գրելուց օրեր անց կրկին տեղափոխել են հիվանդանոց: Մարտի 8-ի երեկոյան երեխաներից մեկի՝ Արտյոմի վիճակը կտրուկ վատացել է:
«Անընդհատ ուտում, հետ էր տալիս, անհանգստացանք, մտածեցինք՝ շուտ տանենք հիվանդանոց, վիճակը չբարդանա»,- NEWS.am-ի հետ զրույցում ասում է երեխաների մայրը՝ Ռիման:
Վատառողջ են եղել նաեւ մյուս տղաները, նրանց տեղափոխել են Վանաձորի բժշկական կենտրոնի մանկական բաժանմունք: Երեխաներին անմիջապես վերցրել են ստացիոնար բուժման:
Բժիշկները երեխաներից երկուսի մոտ նախ թոքաբորբ են կասկածել,սակայն այսօր առավոտյան կատարված հետազոտություններից հետո Արտյոմի մոտ ախտորոշվել է միակողմանի թոքաբորբ, Արենի ու Արմանի մոտ՝ վերին շնչուղիների հիվանդություն:
Երեխաների մոր խոսքով, փոքրիկները մանկական կերի ու մանկական տակդիրների կարիք ունեն:
§Հագուստով շատ են օգնել, մինչեւ հիմա էլ դեռ շարունակում են օգնել: Կեր ու պամպերսներ էլ էին տվել, բայց արդեն վերջացել է: Հիմա ամենաշատը դրանից ենք խեղճանում¦,- ասում է նա:
News.am-ի թղթակցի հետ զրույցի ընթացքում երեխաների բժշկուհին՝ Ծովինար Վարդանյանը դժվարացավ ասել, թե որքան կտեւի ստացիոնար բուժումը. «Երեխաները շատ փոքր են, խնամքի կարիք ունեն: Մինչեւ լիարժեք լավ վիճակում չլինեն, դուրս չենք գրի»:
