Salomon Brothers ներդրումային բանկի նախկին գլխավոր տնօրեն Ջոն Գուտֆրենդը, որին   1980-ների կեսերին «Ուոլլ սթրիթի արքա» էին կոչում,  Նյու Յորքում մահացել է 86 տարեկան հասակում, հինգշաբթի` մարտի 10-ին տեղեկացնում է Bloomberg-ը: Գուտֆրենդը մահացել է հիվանդանոցում` թոքաբորբի պատճառով: 

Գուտֆրենդը Salomon Brothers-ը փոխառության տոմսերի առեւտրով զբաղվող ավանդական բիզնեսից վերածեց այնպիսի ոլորտներում առաջատար դարձած բանկի, ինչպիսին է հիպոթեքային ածանցյալ արժեթղթերի ոլորտը: Salomon-ի կապիտալը 30 տարում  209 մլն դոլարից աճեց մինչեւ 3,4 մլրդ դոլարի եւ բանկը կարողացավ դիմանալ   1987-ին  շուկայի աղետալի փլուզմանը:   

1991-ին Գուտֆրենդը խոստովանեց, որ խախտել է ԱՄՆ-ի Ֆինանսների նախարարության կանոնները` ֆոնդային բորսայում հաճախորդների կողմից չթույլատրված գործարքներ անելով:  Սկանդալը Գուտֆրենդին ստիպեց հրաժարական տալ, ինչից հետո բանկը ժամանակավորապես գլխավորեց առաջատար փոքրամասնական բաժնետեր Ուորեն Բաֆետը, հայտնում է Lenta-ն:

Սկանդալի հետեւանքով համբավին հասցված վնասի պատճառով ֆինանսիստը խնդիրներ ուներ բանկային բիզնեսում բարձր պաշտոններ զբաղեցնելու առումով: Այսպես,  2010-ին  հրաժարվեցին նրան ընտրել ԱՄՆ-ի խոշորագույն բանկի`  JP Morgan-ի տնօրենների խորհրդի անդամ:

1998-ին Salomon-ը ձեռք բերեց Travelers Group-ը, իսկ ներկա պահին վարկային կազմակերպությունը բանկային  Citigroup կոնգլոմերատի մաս է կազմում: