նախընտրելի դարձնել
ՀՀ բնապահպանության նախարարության աշխատակազմի բնապահպանական պետական տեսչության կողմից 11-15.04.2016թ. ժամանակահատվածում իրականացված շրջայցերի ընթացքում հայտնաբերված խախտումների քննության արդյունքում կայացվել է 730.0 հազար դրամ ընդհանուր գումարի վարչական տուգանքի 10 որոշում եւ հաշվարկվել 409.5 հազար դրամ ընդհանուր գումարի շրջակա միջավայրին հասցված վնաս
Մասնավորապես`
Բուսական աշխարհի պահպանության ոլորտ
Լոռու տարածքային բաժնի վարույթին հանձնված գործի քննության արդյունքում 1 ֆիզիկական անձի նկատմամբ կայացվել է 50.0 հազարդրամի վարչական տուգանքի որոշում եւ հաշվարկվել է 130.5 հազարդրամի շրջակա միջավայրին հասցված վնաս, իսկ բաժնի հայտնաբերած ապօրինի հատված ծառերի համար ֆիզիկական անձի նկատմամբ հաշվարկվել է 207.0 հազարդրամի շրջակա միջավայրին հասցված վնաս: Հարուցվել է վարչական վարույթ:
Մթնոլորտային օդի պահպանության ոլորտ
Շիրակի տարածքային բաժնի հայտնաբերած առանց անթափանց ծածկոցի սորուն նյութ տեղափոխելու համար ֆիզիկական անձի նկատմամբ կայացվել է 50.0 հազարդրամի վարչական տուգանքի որոշում:
Բնապահպանական եւ բնօգտագործման վճարի եռամսյակային հաշվետվությունները սահմանված ժամկետում չներկայացնելու համար Գեղարքունիքի տարածքային բաժնի կողմից տնտեսվարողի նկատմամբ կայացվել է 100.0 հազարդրամի վարչական տուգանքի որոշում:
Արմավիրի տարածքային բաժնի կողմից տնտեսվարողի նկատմամբ կայացվել է 100.0 հազար դրամի վարչական տուգանքի որոշում:
Փայտանյութի ապօրինի տեղափոխում
Անտառների եւ կենսաբազմազանության վերահսկողության բաժնի կողմից ստուգայցերի ընթացքում հայտնաբերված խախտումների համար 2 ֆիզիկական անձի նկատմամբ կայացվել է 200.0 հազարդր ընդհանուր գումարի վարչական տուգանքի 2 որոշում եւ հաշվարկվել է 72.0 հազարդր ընդհանուր գումարի շրջակա միջավայրին հասցված վնաս:
Ապօրինի որսի իրականացման համար
Գեղարքունիքի տարածքային բաժնի եւ «Սեւան ԱՊ» ՊՈԱԿ-ի աշխատակիցների համատեղ իրականացված շրջայցերի ընթացքում հայտնաբերված խախտումների համար 3 ֆիզիկական անձանց նկատմամբ կայացվել է 150.0 հազար դրամ ընդհանուր գումարի վարչական տուգանքի 3 որոշում: Առգրավված 25.2կգ կենդանի խեցգետինը սահմանված կարգով բաց է թողնվել Սեւանա լիճ:
Արմավիրի տարածքային բաժնի կողմից ստուգայցերի ընթացքում հայտնաբերված խեցգետնի ապօրինի որսի համար ֆիզիկական անձի նկատմամբ կայացվել է 80.0 հազարդրամի վարչական տուգանքի որոշում: Երեւանի տարածքային բաժնի կողմից շրջայցերի ընթացքում առգրավվել է 14.0կգ /31 հատ/ «սիգ» տեսակի տիրազուրկ ձուկ, ինչը սահմանված կարգով հանձնվել է «Զատիկ» երեխաների աջակցության կենտրոն:
Ընդհանուր առմամբ ՀՀ բնապահպանության նախարարության բնապահպանական պետական տեսչության կիրառած պատժամիջոցներից հաշվետու ժամանակահատվածում ՀՀ պետական բյուջե է մուտքագրվել 3.1 մլն դրամ:
