Նախընտրելի
ՀՀ կրթության եւ գիտության նախարար Լեւոն Մկրտչյանն աշխատանքային խորհրդակցություն է հրավիրել, որի ընթացքում քննարկվել են Լեզվի պետական տեսչության գործունեության վերաբերյալ առկա խնդիրներն ու Հայերենի բարձրագույն խորհուրդ ձեւավորելու առաջարկությունը:
ԿԳՆ-ից NEWS.am-ին հայտնում են, որ քննարկման մասնակից շահագրգիռ կառույցների ներկայացուցիչներն արձանագրել են, որ պետական քաղաքականության կարեւոր բաղադրիչներից է լեզվաքաղաքականությունը եւ Լեզվի պետական տեսչությունը, լինելով այդ խնդրով զբաղվող միակ պետական կառույցը, բավարար լիազորություններ չունի առկա խնդիրները կանոնակարգելու՝ համապատասխան քաղաքականությունը մշակելու եւ միաժամանակ նաեւ իրագործելու համար:
ՀՀ կրթության եւ գիտության նախարար Լեւոն Մկրտչյանին ներկայացվել են մի քանի առաջարկություններ, մասնավորապես Լեզվի տեսչության կարգավիճակը բարձրացնելու եւ զուգահեռաբար նաեւ Հայերենի բարձրագույն խորհուրդ ձեւավորելու վերաբերյալ:
Նախարար Մկրտչյանն իբրեւ մտահոգություն նշել է, որ եթե ձեւավորվող մարմինը լինելու է ընդամենը խորհրդակցական, ապա այն կարող է իրականում գործող կառույց չդառնալ. «Խորհրդակցական մարմինները ֆունկցիոնալ առումով չեն կարող ազդեցիկ լինել: Խնդիրը շատ հին է եւ տարիների պատմություն ունի: Եթե խորհուրդներն իրավական ակտեր թողարկելու իրավասություն չունեն, ապա նրանց որոշումները պարտադիր կատարման ենթակա չեն: Վստահ եմ, որ հատկապես լեզվաքաղաքականության ոլորտում շատ կարեւոր է սահմանադիր մարմին ունենալը: Իմ մոտեցումը հետեւյալն է. լեզվի պետական տեսչության կարգավիճակը բարձրացնել՝ տալով գործադիր մարմնի գործառույթներ եւ զուգահեռաբար ստեղծել Հայերենի բարձրագույն խորհուրդ՝ որպես լեզվաքաղաքականության օրենսդիր մարմին: Այս երկու մարմինները միմյանց փոխլրացնելով կդառնան լեզվի սահմանադիր մարմին»,- նշել է Լեւոն Մկրտչյանը:
Հայերենի բարձրագույն խորհրդի, Լեզվի պետական տեսչության գործառույթների ընդլայնման, իրավական դաշտի փոփոխությունների եւ լեզվաքաղաքականության խնդիրների շուրջ ծավալվել է շահագրգիռ մտքերի փոխանակում, ներկայացվել են տարբեր մոտեցումներ՝ մասնավորապես տերմինաբանական կոմիտեի գործունեության վերականգնման, սփյուռքի ներուժի օգտագործման, արեւմտահայերենի զարգացման եւ դպրոցական ծրագրերում կամընտրական դասընթացների ներդրման, ինչպես նաեւ այլ հարցերի վերաբերյալ:
Առաջիկայում նախատեսվում են քննարկումներ ՀՀ կառավարությունում եւ մասնագիտական լայն շրջանակներում՝ շահագրգիռ կառույցների մասնակցությամբ:
