նախընտրելի դարձնել
Հնագետները, որոնք պեղումներ են իրականացնում Կրեմլի ապամոնտաժված 14-րդ մասնաշենքի տեղում, 12-14 դդ-ի արտեֆակտեր են հայտնաբերել:
Ռուսաստանի նախագահի գործերի կառավարչությունից պարզաբանել են, որ մասնագետները արտեֆակտեր են հայտնաբերել, որոնք վկայում են «Կրեմլի արեւելյան մասի յուրացման մասին XII դարավերջից ոչ ուշ եւ աշխույժ քաղաքային կյանքի մասին»:
Գտածոների թվում են ապակե թեւնոցներ, ապակե տարաների բեկորներ, կանացի հագուստի մետաղական զարդարանքներ, զանգվածեղ կերամիկ նյութեր:
Մամուլի ծառայությունից հայտնել են, որ «առավել արտահայտիչ առարկաների թվում է գրչասայրը` գտածո, որպիսիք այնքան էլ շատ չեն Հին Ռուսաստանի Հյուսիս-Արեւելյան քաղաքներում»:
Կրեմլի 14-րդ մասնաշենքի տեղում 2015-ի նոյեմբերից հնագիտական հետազոտություններ են անցկացնում ՌԳԱ-ի Հնագիտության ինստիտուտի մասնագետները: Պեղումներն իրականացվում են Իվանովյան հրապարակի եւ Սպասյան աշտարակի միջեւ:
Հնագետներին արդեն «հաջողվել է ի հայտ բերել Նիկոլաեւյան փոքր պալատի կառույցների մի մասը (որի հիմքը դրվել է 1775-ին Մատվեյ Կազակովի նախագծով), Համբարձման վանքի Եկատերինյան եկեղեցու (1817 թ, կառուցվել է Կառլ Ռոսսիի նախագծով), ճաշասրահի, որը միացված է Ավետման եկեղեցու եւ Հրաշքի վանքի Ալեքսեյյան եկեղեցու հետ (XVII դ-ի վերջ)»:
ՌԲԿ-ն հայտնում է, որ Կրեմլի 14-րդ մասնաշենքի ապամոնտաժումը կավարտվի 2016-ի ապրիլի 29-ին: Շենքը կառուցվել էր 1932–1934 թթ-ին ավերված Հրաշքի եւ Համբարձման վանքերի եւ Նիկոլաեւյան փոքր պալատի տեղում: Մասնաշենքում նախ տեղակայվել էր Խորհրդային 1-ին ռազմական դպրոցը, 1938-ին շենք էր տեղափոխվել ԽՍՀՄ Գերագույն խորհրդի նախագահությունը: Մինչեւ 1991 թվականը շենքում անցկացվել են ԽՍՀՄ Գերագույն խորհրդի նիստերը: ԽՍՀՄ-ի փլուզումից հետո մինչեւ 2008 թվական 14-րդ մասնաշենքում ընթացել են Ռուսաստանի Դաշնության նախագահի մամուլի ասուլիսները:
