«Սասնա ծռեր» խմբի անդամ, անազատության մեջ գտնվող Հովհաննես  Հարությունյանի առողջական վիճակը օրեցօր վատանում է, սակայն վիրահատություն չի կատարվում: Այս մասին NEWS.am-ի հետ զրույցում այսօր` օգոստոսի 22-ին ասել է  Հովհաննես Հարությունյանի պատպան Արա Ղարագյոզյանը:

Նշենք, որ Հովհաննես Հարությունյանը ՊՊԾ գնդում հրզենային վիրավորում է ստացել ոտքից, նա գտնվում է դատապարտյալների հիվանդանոցում:

«Ոտքի մատները այլեւս չի կարողանում շարժել, օրեցօր վիճակը վատանում է, սակայն վիրահատություն չի կատարվում: Առաջին անգամ բեկորներն են հանել ոտքից, հիմա պետք է վիրահատություն կատարվի, օրեցօր ցավերը ուժգնանում են, դեղեր ներարկում են, որը չի էլ օգնում: Բժիշկները պատճառաբանում են, որ դեռ վիրահատության ժամանակը չէ»,-ասել է  պաշտպանը:

Նրա խոսքով`  այդ առողջական վիճակում պատճաշ բուժօգնություն չցուցաբերելը համարվում է խոշտանգում:

«Եվրոպական դատարանը  նախադեպային որոշում ունի, որ պատշաճ բժշկական օգնություն չցուցաբերելը համարվում է խոշտանգում, պաշտպանները դա դիտարկում են որպես անմարդկային վերաբերմունք, խոշտանգում, որովհետեւ մարդը ժամանակին չի վիրահատվում: Մենք այսօր ստիպված արդեն դիմել ենք Կարմիր խաչի միջազգային առողջապահության կազմակերպությանը, որ նրանք արձագանքեն, հարցում ուղարկեն` պատճառն ինչ է, որ վիրահատություն տեղի չի ունենում, նրաք պետք է այսօր  այցելեն Հովհաննեսին»,-ասել է Արա Ղարագյոզյանը: 

Փաստաբանը նշեց, որ այսօրվանից դադարեցվել է դատապարտյալների հիվանդանոցում բուժակների ծառայությունը: Այսինքն` «էրեբունի» բժշկական կենտրոնը այլեւս վերահսկողություն չի իրականացնելու, ինչի վերաբերյալ հիմնավորում չեն ներկայացրել պաշտպաններին:  Պաշտպանը այս որոշման մեջ միտում են տեսնում, եւ Հովհաննեսի  նկատմամբ այս վերաբերմունքը համարում է խոշտանգում: