նախընտրելի դարձնել
Ռուսաստան աշխատանքի մեկնող հայ միգրանտները հնարավորություն կստանան Ռուսաստանում աշխատելու օրինական թույլտվություն ստանալ Երեւանում։ Այսօր` հոկտեմբերի 28-ին կառավարությունը հաստատեց Ռուսաստանի կառավարության հետ մի համաձայնագիր, ըստ որի Ռուսաստանի դաշնային միգրացիոն ծառայությունը Երեւանում կարող է ներկայացուցչություն բացել։ Սա բխում է Ռուսաստանի նոր միգրացիոն քաղաքականությունից, ըստ որի՝ աշխատանքի թույլտվություններ պետք է իրականացվեն ելքի երկրներում։
Ըստ կառավարության տրամադրած տեղեկանքի՝ Հայաստանից սկիզբ առնող միգրացիոն հոսքերի հիմնական վեկտորն ուղղված է դեպի Ռուսաստանի Դաշնություն, ինչն առավել ցայտուն է արտահայտված հատկապես սեզոնային աշխատանքային միգրանտների դեպքում (ըստ հետազոտությունների տվյալների՝ 93 տոկոսն ընտրում է հենց Ռուսաստանի Դաշնությունը)։
Հայաստանցի միգրանտների անօրինական կարգավիճակի պատճառով հաճախ ոտնահարվում են նրանց իրավունքները եւ նրանք հայտնվում են անպաշտպան վիճակում։
