Հայ դաշնակահար եւ կոմպոզիտոր Շահան Արծրունու Նյու Յորքի Քարնեգի Հոլլի բեմում տված համերգը, որտեղ նա ներկայացրել է հայ եւ թուրք կոմպոզիտորների դասական ստեղծագործություններ, միանշանակ չի ընդունվել:

Բանն այն է, որ համերգից օրեր առաջ սփյուռքյան մի քանի հայկական կազմակերպություններ դիմել էին անվանի երաժիշտին` հրաժարվելու մասնակցել մի միջոցառման, որը կազմակերպվել էր Նյու Յորքում Թուրքիայի գլխավոր հյուպատոսության եւ հետեւաբար` Թուրքիայի կառավարության կողմից եւ հովանու ներքո: Արծրունին անարձագանք էր թողել այդ դիմումը:

Համերգը շատ լավ է անցել, սակայն, համերգին դեմ հանդես եկող մի քանի հայ երիտասարդներ բողոքի ակցիա են կազմակերպել Քարնեգի Հոլի հարակից խաչմերուկում: Նրանք դեպի կենտրոն ուղղվող անցորդներին են բաժանել արյունոտ կիսալուսնով եւ Աղթամարի վանքի ու Անիի ավերված եկեղեցիների պատկերով մի քարտաթերթիկ, որի վրա գրված է եղել. «Առանց արդարության ոչ մի հաշտություն: Ոչ մի զիջում հանուն հաշտության: Հայ-թուրքական հաշտությունը նախեւառաջ ենթադրում է Հայկական Ցեղասպանության հարցում արդարություն ...»:

Չնայած ազգայնական երիտասարդների այս «բոյկոտին», սփյուռքահայ նյույորքցիների բավական բարձրաշխարհիկ մի զանգված այնուամենայնիվ տոմս էր գնել եւ գնացել համերգին:

Ծրագրում ներառված էին հիմնականում հայ կոմպոզիտորների գործեր` մասնավորապես Կոմիտաս, Սերգեյ Ասլամազյան, Էդվարդ Բաղդասարյան, Ալան Հովհաննես եւ Արամ Խաչատրյան: Ծրագրի մի մասը թուրքական ստեղծագործություններ էին` Ֆերիդ Ալնար, Յուքսել Կոպտագել, Ադնան Սայգուն եւ Չիհատ Աշկին: Վերջինս մասնակցում էր համերգին` որպես ջութակահար` կատարելով ինչպես հայկական այնպես էլ սեփական ստեղծագործությունները:

Համերգին մասնակցել է Թուրքիայի գլխավոր հյուպատոսն իր կնոջ հետ:

Ավելի վաղ NEWS.am-ը հայտնել էր, որ աշխարհահռչակ դաշնակահար Շահան Արծրունին Վանի Ախթամարի եկեղեցու բացման նախօրեին` հոկտեմբերի 18-ին Վանի Յուզունջու Յըլ համալսարանի մշակույթային կենտրոնում համերգ էր տվել, որին ներկա են եղել Վանի նահանգապետ Մյունուր Քարալօղլուն, Վանի ժանդարմերիայի հրամանատար, գեներալ Նազըմ Ալթընթաշը, Վանի գլխավոր դատախազ Մուստա‎‎ֆա Ալփերը, փոխպատրիարք, արքեպիսկոպոս Արամ Աթեշյանը, ինչպես նաեւ մեծ թվով թուրք եւ հայ քաղաքացիներ:

 

Լուսանկարները` Զևա Դեմերոնիի