նախընտրելի դարձնելԳյուղատնտեսական նախապատրաստական աշխատանքներին զուգահեռ հանրապետության անտառային եւ հարակից տարածքներում մեծացել է հրդեհների առաջացման եւ տարածման վտանգը, ինչի մասին են վկայում նաեւ անտառային հրդեհների դեպքերը:
Գյուղնախարարությունից NEWS.am-ին հայտնում են, որ համայնքի սեփականություն հանդիսացող ցանքատարածքները բուսական մնացորդներից մաքրելու նպատակով բնակչության կողմից կատարվում են հրկիզումներ, որոնք հաճախ տարածվում են անտառային տարածքներ` մեծ վնաս պատճառելով բնությանը եւ շրջակա միջավայրին:
ՀՀ գյուղատնտեսության նախարարությունը հիշեցնում է, որ «Մթնոլորտային օդի պահպանության մասին» օրենքի համաձայն` արգելվում է այրել խոզանները, բուսական մնացորդներով ու չորացած բուսականությամբ տարածքները, արոտավայրերի ու խոտհարքների բուսականությունը գյուղատնտեսական, անտառամերձ, անտառային ու բնության հատուկ պահպանվող տարածքներում:
Հրդեհավտանգ ժամանակաշրջանում գյուղատնտեսական նշանակության հողերում հրդեհների կանխարգելման նպատակով, արգելվում է`
1/ Կրակ վառել
2/ Վառվող լուցկի կամ ծխախոտի մնացորդ գցել
3/ Յուղերով, բենզինով եւ դյուրավառ այլ հեղուկներով ներծծված լաթեր թողնել
Հրդեհավտանգ ժամանակաշրջանում գյուղատնտեսական աշխատանքներ իրականացնելիս հրդեհաշիջման նպատակով պատրաստ վիճակում պետք է ունենալ հակահրդեհային սարքավորումներ ու սկզբնական հրդեհաշիջման միջոցներ (կրակմարիչներ, ջրով լի տարաներ, բահեր եւ այլն):
Գյուղատնտեսական հողերում ծագած հրդեհների դեպքում, որոնք կարող են ներթափանցել անտառային տարածք, հողօգտագործողները պետք է անմիջապես ահազանգեն ՀՀ ԱԻՆ տեղական ստորաբաժանումներին, ինչպես նաեւ սեփական ուժերով միջոցներ ձեռնարկեն հրդեհի մարման համար` մինչեւ համապատասխան օգնության ժամանելը:
