նախընտրելի դարձնելԵս ընտելացել եմ, որ իմ ցանկությունների մասին մամուլից եմ տեղեկանում: «Մեդիա կենտրոն»-ում այսօր՝ մարտի 28-ին լրագրողների հետ հանդիպման ժամանակ այս մասին հայտարարեց ՀՀԿ փոխնախագահ Արմեն Աշոտյանը՝ պատասխանելով մամուլի հրապարակումների մասին հարցին, թե ուզում է ԱԺ նախագահ դառնալ:
«Ուզում եմ մնալ քաղաքական դաշտում: Կարծում եմ՝ ես բազմապրոֆիլ եւ մրցունակ գործիչ եմ»,- հավելեց Աշոտյանը:
Անդրադառնալով հարցին, թե ՀՀԿ-ական որոշ գործիչներ, այդ թվում Էդուարդ Շարմազանովն ու ինքը՝ Արմեն Աշոտյանը, վարկաբեկված են, այդ պատճառով նախընտրական քարոզչության ընթացքում հրապարակային միջոցառումների չեն մասնակցում եւ նրանց փոխարինել են նոր դեմքեր՝ վարչապետի գլխավորությամբ, Աշոտյանը պատասխանեց, որ այն, ինչ կարելի է տեսնել հանրահավաքներին, ընդամենը սառցաբեկորի գագաթն է:
Նա հիշեցրեց, որ նախընտրական գործընթացի կազմակերպման պատասխանատուներից է, այս շրջանում հյուրընկալվել է բազմաթիվ հաղորդումների, Շարմազանովն էլ իր հերթին է ասուլիսներ տալիս:
«Ես հասկանում եմ որոշ քաղաքական շրջանակների «բզբզոցները», բայց դա միայն ժպիտ է առաջացնում, եթե «բզբզելու» լինենք, «Ելք»ի եւ «Ծառուկյան» դաշինքի ներսում նույնքան բզբզելու բան կա: Իսկ ես, վարկաբեկված լինելով, մեր քարոզչության պատասխանատուն եմ»,- հայտարարեց Աշոտյանը:
