ՆախընտրելիՀայաստանի իշխանություններին պետք է խանգարել Երեւանում կրկնել այն անօրինականությունը, որը թույլ տրվեց Վանաձորում: Այս մասին ապրիլի 10-ին լրագրողների հետ հանդիպմանն ասաց «Ելք» դաշինքից Երեւանի ավագանու թեկնածու առաջադրված Դավիթ Խաժակյանը:
Նրա խոսքով՝ իշխանությունները փոփոխություններ են արել օրենսդրությունում, ըստ որի՝ ապօրինի ընտրված քաղաքապետը, իշխանության ներկայացուցիչը կարող է նիստ հրավիրել, թեեւ մեծամասնություն նա չունի (ավագանու ընդդիմադիր անդամները բոյկոտում են նիստը): Որպեսզի նույնը տեղի չունենա Երեւանում, պետք է այնպես անել, որ ընդդիմությունն անվերապահորեն հաղթի:
«Իշխանությունները ոչ թե քաղաքային տնտեսությամբ, այլ իրենց սեփական քաղաքական շահերով կզբաղվեն: Երեւանի ավագանու ընտրություններում մենք պետք է 40%-ից ոչ պակաս ձայն ստանանք, որպեսզի մեր քաղաքապետի թեկնածուն ավագանիում անցողիկ մեծամասնություն ունենա»,- ասել է Խաժակյանը:
Հիշեցնենք, որ Երեւանի ավագանու ընտրությունները տեղի կունենան մայիսի 14-ին: Ավագանու խորհուրդն էլ քաղաքապետ կընտրի:
