Ռուսաստանի նախագահ Վլադիմիր Պուտինը Սաուդյան Արաբիայի թագավոր Սալման բեն Աբդել Ազիզ Ալ Սաուդի հետ հեռախոսային խոսակցության ժամանակ քննարկել է Եմենում տիրող  իրավիճակը։

Կրեմլի մամուլի ծառայությունը հայտնում է, որ Սաուդյան Արաբիայի թագավորը լուրջ մտահոգություն է հայտնել  Էր Ռիադի ուղղությամբ «Անսար Ալա» եմենական շարժման զինյալների կողմից դեկտեմբերի 19-ին արձակված բալիստիկ հրթիռի հետ կապված։

Դատապարտելով նմանատիպ գործողությունները՝ Պուտինը  ընդգծել է  միջադեպի համակողմանի հետաքննության  կարեւորությունը եւ  արտահայատվել է Եմենի ճգնաժամի բացառապես խաղաղ կարգավորման օգտին՝ ազգային երկխոսության միջոցով։

Սիրիայում տիրող իրավիճակի վերաբերյալ կարծիքների փոխանակման ժամանակ երկու կողմերն էլ ընդգծել են քաղաքական կարգավորմանն ուղղված ջանքերի ակտիվացման անհրաժեշտությունը:

Անդրադարձ է կատարվել ռուս-սաուդյան համագործակցության  որոշ հարցերի, այդ թվում՝ էներգետիկայի ոլորտին վերաբերող: Մասնավորապես,  երկու երկրների ղեկավարները  պայմանավորվել են համաշխարհային շուկայում ածխաջրածինների կայունության պահպանման համար սերտ համագործակցության շուրջ ։