Վրաստանի համար կարեւոր է Հայաստանի հետ համագործակցության ընդլայնումը: Այս մասին մարտի 26-ին Երեւանում ՀՀ Ազգային ժողովի փոխխոսնակ, Հայաստանի իշխող Հանրապետական կուսակցության մամուլի քարտուղար Էդուարդ Շարմազանովի հետ հանդիպման ժամանակ հայտարարել է Վրաստանի արտակարգ եւ լիազոր դեսպան Գեորգի Սագանելիձեն:

Ինչպես NEWS.am-ին հայտնեցին ԱԺ մամուլի ծառայությունում, հանդիպման ընթացքում Շարմազանովը նշել է, որ անհրաժեշտ է զարգացնել եւ ընդլայնել հայ-վրացական հարաբերությունները բոլոր հնարավոր ուղղություններով: Այս համատեքստում նա ընդգծել է հարաբերությունների ակտիվացման կարևորությունը ոչ միայն բարեկամության խորհրդարանական խմբերի միջեւ, այլեւ՝ օրենսդիր մարմինների հանձնաժողովների մակարդակով:

ՀՀ խորհրդարանի փոխխոսնակն անդրադարձել է նաեւ տարածաշրջանային անվտանգության հարցերին: Խոսելով Լեռնային Ղարաբաղի խնդրի մասին՝ նա նշել է, որ Հայաստանի իշխանությունները կողմ են խաղաղ կարգավորմանը, մինչդեռ  Բաքվի դիրքորոշումը այլ է: Զրուցակիցները քննարկել են նաեւ մշակույթի եւ զբոսաշրջության ոլորտներում համագործակցության ուղղությունները:

Դեսպան Սագանելիձեն իր հերթին կարեւորել է բոլոր բնագավառներում հարաբերությունների զարգացման կարեւորությունը, հատկապես՝ խորհրդարանական դիվանագիտության ոլորտում: