նախընտրելի դարձնել
Նոյեմբերի 13-ին Կառավարությունը իտալական Renco ընկերության հետ Երեւանում 250 ՄՎտ հզորությամբ համակցված շոգեգազային ցիկլով նոր էլեկտրակայանի կառուցման վերաբերյալ փոփոխված շրջանակային համաձայնագիր ստորագրեց:
Փաստաթուղթը ստորագրեցին էներգետիկ ենթակառուցվածքների եւ բնական պաշարների նախարարի պաշտոնակատար Գարեգին Բաղրամյանը, Renco S.p.A-ի գործադիր տնօրեն Ջովաննի Ռուբինին, եւ «Արմփաուեր» ընկերության գլխավոր գործադիր տնօրեն Քրիստիան Կուկուռակին։
Համաձայնագրի ստորագրումից հետո նախարարի պաշտոնակատար Գարեգին Բաղրամյանը լրագրողների հետ զրույցում նշեց, որ Renco ընկերության հետ երկու ամիս տեւած բանակցություններից հետո հաջողվեց էլեկտրաէներգիայի սակագնի նվազեցման հասնել՝ նախկինում 1կՎտ/ժ-ի համար համաձայնեցված 6.02 ցենտից (առանց ԱԱՀ) մինչեւ 5,7 ցենտ 1կՎտ/ժ-ի համար:
Այսպիսով, ապագա էլեկտրակայանի էլեկտրաէներգիայի արժեքը կլինի ամենացածրը Հայաստանում գործող նմանատիպ կայաններից` 27.4 դրամ 1 կվտ/ժամի համար (Հրազդանի ՋԷԿ-ի 5-րդ բլոկում սակագինը 1 կՎտ/ժամի համար 31.5 դրամ է, Երեւան ՋԷԿ-ում`1 կՎտ/ժամի համար` 29.4 դրամ):
«Սպառողն, անշուշտ, դա կզգա, քանի որ մեծածախ գնի փոփոխությունը կազդի վերջնական սպառողական գների վրա», - ասաց Բաղրամյանը:
Սակագների նվազեցումն իր հերթին թույլ կտա Հայաստանին տարեկան 6,4 մլն դոլար տնտեսել, իսկ 25 տարվա ընթացքում՝ 162,5 մլն դոլար: Նոր ՋԷԿ-ը կկառուցվի լավագույն տեխնոլոգիաների կիրառմամբ, իսկ օգտակար գործողության գործակիցը (ՕԳԳ) կլինի 53 տոկոս (Հրազդանի ՋԷԿ-ի 5-րդ բլոկի ՕԳԳ-ն հավասար է 44 տոկոսի, Երեւանի ՋԷԿ-ի`49 տոկոս): Շինարարությունը կսկսվի երկու ամսվա նախապատրաստումից հետո եւ կտեւի 26 ամիս:
«Նոր համաձայնագրով իրավաբանական կետերով մի շարք փոփոխություններ են նախատեսված, մասնավորապես նախորդ փաստաթղթով նախատեսված կառավարական երաշխիքներ, օրինակ՝ արժութային փոխարժեքի փոփոխության վերաբերյալ (երկրի ԿԲ-ին անհանգստացնող)»,- նշեց Բաղրամյանը:
Կայանը կկառուցվի Երեւանի ՋԷԿ-ի հարակից տարածքում եւ կոչված կլինի փոխհատուցել Հրազդանի ՋԷԿ-ի հզորությունը: Բացի այդ կայանը թույլ կտա ապահովել էլեկտրաէներգիայի ավելացող պահանջարկը: Ինչպես հայտնի է՝ Հայաստանում կրիպտոարժույթների մայնինգի համար 110 ՄՎտ հզորությամբ ֆերմաներ են կառուցվում: Էներգաբլոկը նաեւ թույլ կտա սպասարկել իրանական կողմի հետ բարտերային գործարքը՝ «Էլեկտրականություն՝ գազի դիմաց», որի շրջանակներում կառուցվում է Իրան-Հայաստան երրորդ էլեկտրափոխանցման գիծը:
Կայանը անհրաժեշտ էներգիայի պաշար կապահովի սեզոնային գործոնով պայմանավորված ներքին սպառման աճի համար, ինչպես նաեւ վթարային իրավիճակներում՝ համակարգի կայունություն:
Նախագծի իրականացման գործընթացում կներգրավվի 1200 մարդ, բլոկի շահագործման պահից այնտեղ բարձր աշխատավրձով կաշխատեն 230-250 մասնագետներ:
Նոր սարքավորումը հաջողությամբ գործարկելու համար 50-70 մարդ Գերմանիայում Siemens ընկերությունում կվերապատրաստվի:
Իր հերթին, Renco-ի գործադիր տնօրեն Ջովաննի Ռուբինին նշեց, որ վերջին 20 տարիների ընթացքում առաջին անգամ Renco-ն Հայաստանում կիրականացնի ընկերության գործունեությանը համապատասխան նախագիծ՝ էլեկտրաէներգիայի արտադրության համար:
Ներդրումների ընդհանուր ծավալը կկազմի 250 մլն դոլար, որոնցից 60 տոկոսը կիրականացնի Renco-ն եւ իտալական SIMEST SpA ընկերությունը, մնացած 40 տոկոսը՝ գլխավոր կապալառու Siemens-ը:
Հիշեցնենք, որ Հայաստանի կառավարությունը նոյեմբերի 1-ի նիստին հավանություն էր տվել Երեւանում 250 ՄՎտ հզորությամբ համակցված շոգեգազային ցիկլով նոր էլեկտրակայանի կառուցման վերաբերյալ փոփոխված շրջանակային համաձայնագրին: Ավելի վաղ հայկական կողմը իր համար ոչ շահավետ կետերի պատճառով կասեցրել էր համաձայնագիրը:
