նախընտրելի դարձնելԱզգային անվտանգության խորհրդի քարտուղար Արթուր Բաղդասարյանը սեպտեմբերի 22-ին ընդունել է Եվրամիության Արևելյան Եվրոպայի, Հարավային Կովկասի եւ Կենտրոնական Ասիայի վարչության տնօրեն Գուննար Վիգանդի գլխավորած պատվիրակությանը:
Ազգային անվտանգության խորհրդի քարտուղարի մամուլի գրասենյակից NEWS.am-ին հայտնում են, որ կողմերը քննարկել են Եվրոպական հարեւանության քաղաքականության «Հայաստան-Եվրամիություն» գործողությունների ծրագրի իրականացման հետ կապված հարցեր, ինչպես նաեւ «Արեւելյան գործընկերության» շրջանակում քաղաքական համագործակցության հեռանկարները:
Գուննար Վիգանդը գոհունակություն է հայտնել ծրագրի իրականացման ընթացքից եւ կարեւորել ԵՄ խորհրդատվական խմբի աշխատանքը Հայաստանում: Կողմերն ընդգծել են Հայաստանում ԵՄ տեղեկատվական կենտրոնների բացման գործընթացն արագացնելու անհրաժեշտությունը:
Արթուր Բաղդասարյանի առաջարկով քննարկվել է Եվրամիության անդամ երկրների հետ վիզային պարզեցված համակարգի ձեւավորման հնարավորությունը: Գուննար Վիգանդը Եվրամիության օժանդակությունն է հայտնել այս խնդրի լուծմանը:
Արթուր Բաղդասարյանը նշել է, որ քննարկումների արդյունքում ստեղծվել է աշխատանքային խումբ՝ ՀՀ փոխարտգործնախարարի գլխավորությամբ, որը ձեռնամուխ կլինի անհրաժեշտ համաձայնագրերի մշակմանը:
Զրուցակիցներն անդրադարձել են նաեւ Հայաստան-Թուրքիա հարաբերությունների կարգավորման խնդրին:
Անդրադարձ է եղել ԼՂ հիմնախնդրի կարգավորմանը՝ տարածաշրջանային կայունության ամրապնդման համատեքստում:
