Արցախյան շուրջ 10 երիտասարդական կազմակերպություններ, ողջունում են ԵԱՀԿ գործող նախագահ, Լիտվայի ԱԳ նախարար Անդրոնիուս Աժուբալիսի փետրվարի սկզբին արած հայտարարությունը, ըստ որի «Ղարաբաղյան հակամարտություն դժվար լուծելի է, քանզի այնտեղ արդեն նոր սերունդ է մեծացել»: Նրանք նաեւ կոչ են արել Աժուբալիսին այցելել Արցախ եւ տեղում լսել այդ նոր սերնդի ձայնը: Համապատասխան նամակը, որն այսօր՝ մարտի 11-ին կհանձնվի ՀՀ-ում Լիտվայի դեսպանատուն եւ ԵԱՀԿ գրասենյակ, մասնավորապես նշվում է.

«Մենք` Ղարաբաղի քաղաքացիական հասարակության ներքոնշյալ ներկայացուցիչները, գրում ենք  հայտնելու մեր բարձր գնահատականը ձեր` վերջերս Ղարաբաղի նոր սերնդի մասին կատարված հայտարարությանը: Մենք ցանկանում ենք հրավիրել ձեզ Ղարաբաղ այս նոր սերնդի ձայը լսելու, ինչի կարիքը դուք բացահայտորեն նշեցիք:

Մենք գիտենք, որ ԵԱՀԿ-ի անդամ երկրները հանձն են առել համագործակցելով ՄԱԿ-ի հետ, հասնել մարդու իրավուքների եւ հիմնարար ազատությունների համաշխարհային ճանաչման, որը ամրագրված է Մարդու իրավունքների համընդհանուր հռչակագրում: Մեր ապրելու, ազատության եւ անձնական անվտանգության իրավունքները դեռեւս սպառնալիքի ներքո են: Ցայսօր մենք ապրում ենք առանց մեր հիմնարար իրավունքների ճանաչման:

Միաժամանակ անդամ երկրները ՄԱԿ-ի կանոնադրությամբ պատասխանատվություն են վերցրել տարբերություն չդնել երկրի կամ տարածքի քաղաքական, իրավական,  կամ միջազգային կարգավիճակը անկախ նրանից թե այն անկախ է, վստահելի, ոչ ինքնակառավարվող, կամ ինքնիշխանության սահմանափակում ունի թե չէ:  Վերոնշյալը նրանք հանձն են առել մարդու իրավունքների եւ հիմնարար ազատությունների առաջխաղացման եւ եւ ապահովման գործում:

Մենք Ղարաբաղում ընդունել ենք Ժիրի Դիենստբիերին` Չեխիայի ԱԳ նախարար, Ադրիան Սեվերինին` ԵԱՀԿ Խորհրդարանական Վեհաժողովի նախագահ, Անդրեյ Կոզըրեւին եւ Եվգենի Պրիմակովին` Ռուսաստանի ԱԳ նախարարներ, Բորիս Ելցինին` Ռուսաստանի նախագահ, Նուրսուլթան Նազարբաեւին` Ղազախստանի նախագահ:

Հաշվի առնելով այդ ամենը, մեծ պատիվ կլինի աշխատել ձեր գրասենյակի հետ, զարգացնելու անհրաժեշտ հնարավորություն Ղարաբաղի նոր սերնդի համար` արտահայտելու մեր հույսերը, երազանքներն ու ցանկությունները նրանց, ովքեր պարտավորվել են ազդեցություն ունենալ  մեր ճակատագրի որոշման վրա»: