Հարյուրավոր արմավիրցիներ փակել են Երեւան-Արմավիր Ճանապարհը: Նրանց բողոքն ուղղված է Արմավիր քաղաքում երեկ՝ մարտի 20-ին տեղի ունեցած քաղաքապետի ընտրությունների դեմ:

Նշենք, որ երեկ թեժ ընտրությունների արդյունքում Արմավիրի քաղաքապետ է վերընտրվել գործող քաղաքապետ, հանրապետական Ռուբեն Խլղաթյանը: Վերջինս լարված պայքարի արդյուքում  հազար ձայնով պարտության է մատնել իր մրցակից ավագանու խորհրդի անդամ  անկուսակցական Սեւակ Մինասյանին:

Եղել են նաեւ այլ թեկնածուներ՝  անկուսակցական Առնակ Գեւորգյանն ու  Կարեն Վարդանյանը, սակայն պայքարը գործող քաղաքապետի ու ավագանու անդամի միջեւ է եղել:  

NEWS.am-ի  թղթակցին ցուցարարները հայտնել են, որ իրենք բողոքում են անարդար ընտրությունների դեմ եւ պահանջում անվավեր ճանաչել Խլղաթյանի հաղթանակը:  Նրանց հավաստմամբ, Ռուբեն Խլղաթյանը վերանվաճել է քաղաքապետի աթոռը բազմաթիվ ընտրախախտումներով ու կեղծիքներով, որոնց մասին թեեւ իրենք հայտնել  են Ոստիկանությանը, սակայն ոստիկանությունը չի արձգանքել:

Չնայած ոստիկանության հորդորներին քաղաքացիները հրաժարվել են ճանապարհը բացել, մինչեւ իրենց պահանջը չկատարեն: Չնայած դեռ ոստիկանությունը կոնկրետ միջոցներ չի ձեռնարկել ճանապարհը բացելու ուղղությամբ, սակայն քաշքշուկ ու հրմշտոց կա:  Ի դեպ, ըստ արմավիրցիների,  վերընտրված քաղաքապետը  ՀՀԿ-ական գործարար պատգամավորներ Ռուբեն Հայրապետյանի  եւ Սամվել Ալեքսանյանի հովանավորյալն է:

Ի վերջո, ոստիկանությունը բռնությամբ ու քաշքշելով հրել են ցուցարարներին եւ բացել ժանապարհը: Ըստ ականատեսների, մի քանի մարդու բերման են ենթարկել ոստիկանության բաժին: