Դանիան եվրոպական առաջին երկիրն է, որն այսօրվանից սկսել է բացել դպրոցներն ու մանկապարտեզները՝ կորոնավիրուսի համավարակի պատճառով մարտի 12-ին սահմանափակումներ մտցնելուց հետո, հայտնում է Agence France-Presse-ը:

Գործակալության տեղեկություններով՝ բացվում են մանկամսուրները, մանկապարտեզները եւ դպրոցների 0-ից 5-րդ դասարանները: Ընդ որում՝ ոչ բոլոր ուսումնական հաստատություններն են պատրաստ եղել ապրիլի 15-ից աշխատելուն, նշում է գործակալությունը: Կոպենհագենում սկսել է աշխատել հաստատությունների միայն 35 տոկոսը, իսկ ամբողջ երկրում պարապմունքները սկսվել են 98 կոմունայից միայն կեսում: Մնացյալը ավելի շատ ժամանակ են խնդրել, սանիտարական նորմերին հարմարվելու համար, որոնք շարունակում են գործել: Ավելի վաղ հաղորդվում էր, որ երեխաները հաստատությունների ներսում պետք է միմյանցից մեծ հեռավորությամբ լինեն, մաքրության պահպանման հսկողությունն ավելի խիստ է լինելու, իսկ հիվանդության չնչին նշանի դեպքում երեխան անմիջապես տուն է ուղարկվելու:

Սպասվում է, որ բոլոր դպրոցներն ու մանկապարտեզները բացվելու են ապրիլի 20-ին:

Դանիայում կորոնավիրուսով վարակման դեպքերի թիվը հասել է 4 647-ի: Հիմա հիվանդանոցներում են 503 վարակակիրներ, 135-ը ինտենսիվ թերապիայի բաժանմունքներում են, մահացել է 187 պացիենտ: Դանիայի կառավարությունը կորոնավիրուսի իրավիճակի հետ կապված մարտի 14-ից երկրի սահմանները փակել էր օտարերկրացիների համար, երկրի բնակիչներին կոչ էին արել չանցկացնել 10 մարդուց ավելի թվաքանակով հավաքներ: Իշխանությունները նաեւ փակել էին բոլոր ուսումնական հաստատությունները, իսկ ծայրահեղ կարեւոր խնդիրներ չկատարող պետական ծառայողներին տուն էին ուղարկել՝ աշխատավարձի պահպանմամբ:

Համավարակի ընթացքում կորոնավիրուսով է վարակվել 1,9 մլն մարդուց ավելին, մոտ 120 հազարը մահացել է: