Նախընտրելի
Դուշանբեի քաղաքապետ Ռուստամ Էմոմալին ուրբաթ ընտրվել է Տաջիկստանի խորհրդարանի վերին պալատի նախագահ, հայտնում է «Sputnik-Տաջիկստանը»:
Տաջիկստանի 6-րդ գումարման խորհրդարանի վերին պալատի առաջին նիստում ելույթ ունենալով՝ հանրապետության ղեկավար Էմոմալի Ռահմոնը շնորհավորել է բոլոր ընտրվածներին եւ խորհրդարանի նշանակված անդամներին:
Հիշեցնենք, որ Ռահմոնն ավելի վաղ հրաման էր ստորագրել Տաջիկստանի խորհրդարանի գումարման մասին:
Ուրբաթ՝ ապրիլի 17-ին, Տաջիկստանում տեղի էին ունեցել խորհրդարանի վերին եւ ստորին պալատների նիստեր:
Ռուստամ Էմոմալին հանրապետության նախագահ Էմոմալի Ռահմոնի ավագ որդին է:
Նա ծնվել է 1987 թվականին, ավարտել է Տաջիկական ազգային համալսարանը՝ «միջազգային տնտեսական հարաբերություններ» մասնագիտությամբ:
Նա ավելի վաղ զբաղեցրել է Տաջիկաստանի Մաքսային ծառայության նախագահի, Տաջիկստանի կոռուպցիայի դեմ պայքարի գործակալության նախագահի պաշտոնները:
2017 թվականի հունվարի 12-ից երկրի նախագահի հրամանով նշանակվել է Դուշանբեի քաղաքապետի պաշտոնում:
Այս տարվա մարտի 27-ին Դուշանբերի ղեկավարին ընտրել էին Տաջիկստանի խորհրդարանի վերին պալատի անդամ: Նրա թեկնածությանը միաձայն աջակցել էին ժողովրդական պատգամավորների քաղաքային եւ մայրաքաղաքային շրջանների մաջլիսների առաջին համատեղ նիստում:
