Հայ-թուրքական սահմանի բացումից ամենից շատ կարող է տուժել մեր գյուղատնտեսությունը: Այսօր NEWS.am-ի թղթակցի հետ զրույցում նման կարծիք հայտնեց Երեւանի նախկին քաղաքապետ, տնտեսագետ Վահագն Խաչատրյանը: Հարցին, թե հատկապես որ ապրանքային խմբերին է հարվածելու սահմանների բացումը, նա պատասխանեց. «Առաջին հերթին գյուղատնտեսությանը: Թուրքական գյուղատնտեսական ապրանքատեսակներն իրենց ապրանքային տեսքով, ինչպես նաեւ ինքնարժեքով բավականին պատրաստված են շուկայում իրացվելու համար: Մենք կարծես ուրիշ մրցակցության ենթակա ապրանքատեսակներ չունենք, որոնք կարող էին տուժել սահմանի բացումից: Ոչ արդյունաբերություն ունենք, ոչ էլ այլ ոլորտում մրցունակ ապրանքնատեսակներ»: