Առեղծվածային ավիաբազա է կառուցվում Եմենի մերձակայքում հրաբխային կղզում, որը գտնվում է էներգիայի եւ կոմերցիոն բեռների մատակարարման աշխարհի կարեւորագույն ծովային անցումներից մեկում, գրում է AP-ը:

Թեեւ ոչ մի երկիր չի հավակնում Բաբ էլ-Մանդեբ նեղուցում գտնվող Մայուն կղզու ավիաբազային, հաշվի առնելով տարիներ առաջ կղզու վրայով հսկայական թռիչքային գոտի կառուցելու նախորդ փորձը, այն կարող է կապված լինել Արաբական Միացյալ Էմիրությունների հետ:

Եմենի կառավարության պաշտոնյաները ասում են, որ վերջին ջանքերի հետեւում էմիրաթցիներն են կանգնած, թեեւ ԱՄԷ-ն 2019 թվականին հայտարարել էր, որ դուրս է բերում իր զորքերը Եմենի հութի ապստամբների դեմ Սաուդյան Արաբիայի գլխավորած ռազմական արշավից:

Աբու Դաբիի պաշտոնատար անձինք եւ Վաշինգտոնում ԱՄԷ-ի դեսպանատունը չեն պատասխանել մեկնաբանություններ անելու խնդրանքներին:

Մայուն կղզու թռիչքուղին թույլ է տալիս յուրաքանչյուրին, ով վերահսկում է այն, էներգիան ուղղել դեպի նեղուց եւ հեշտությամբ ավիահարվածներ հասցնել մայրցամաքային Եմենին: Կղզին նաեւ բազա է Կարմիր ծովում, Ադենի ծոցում եւ մոտակա Արեւելյան Աֆրիկայում բոլոր գործողությունների համար:

Planet Labs-ի արբանյակային պատկերներում, որոնք ստացել է Associated Press-ը, երեւում է, որ ապրիլի 11-ին կղզում շինարարական մեքենաներ են եղել, որոնք 1,85 կմ երկարությամբ թռիչքուղի են կառուցել: Մայիսի 18-ին այս աշխատանքն ավարտվել է, եւ թռիչքուղու հարավում ասֆալտի վրա երեք անգարներ են կառուցվել:

Այս երկարությամբ թռիչքուղին կարող է ընդունել գրոհային, հետախուզական եւ տրանսպորտային ինքնաթիռներ:

Եմենի կառավարության ռազմական պաշտոնյաները, որոնց Սաուդյան Արաբիայի գլխավորած կոալիցիան աջակցում է 2015 թվականից, ասում են, որ հենց ԱՄԷ-ն է կառուցում թռիչքուղին: Նրանց խոսքով՝ վերջին շաբաթներին Էմիրությունների նավերը զենք, տեխնիկա ու զորքեր են տեղափոխել Մայուն կղզի:

Ռազմական պաշտոնյաները հայտարարել են, որ ԱՄԷ-ի եւ Եմենի նախագահ Աբդ Ռաբբու Մանսուր Հադիի միջեւ վերջին լարվածությունը մասամբ ծագել է Մայունի համար 20-ամյա վարձակալության պայմանագիր ստորագրելու Էմիրությունների պահանջներից։