նախընտրելի դարձնել
United Airlines-ը ցանկանում է վերադարձնել գերձայնային ճանապարհորդություններն ինքնաթիռով, որը ներկայումս գոյություն ունի միայն թղթի վրա, հաղորդում է ABC News-ը:
Ավիաընկերությունը հայտարարել է, որ նախատեսում է 15 ինքնաթիռ գնել Boom Supersonic-ից այն բանից հետո, երբ ստարտափն ինքնաթիռ կմշակի, որը թռնելու է ձայնի արագությունից ավելի արագ՝ միաժամանակ պահպանելով անվտանգության եւ բնապահպանական չափանիշները:
United Airlines-ն ակնկալում է նման ինքնաթիռներ ձեռք բերել 2029 թվականին: Ավիաընկերությունից հայտնել են, որ ինքնաթիռը Լոնդոնի եւ Նյու Յորքի միջեւ թռիչքների ժամանակը կկրճատի մինչեւ 3.5 ժամ, իսկ Սան Ֆրանցիսկոյից Տոկիո թռնել հնարավոր կլինի ընդամենը 6 ժամում:
United-ը հրաժարվել է քննարկել ֆինանսական պայմանները, սակայն Boom-ի գործադիր տնօրեն Բլեյք Շոլն ասել է, որ գործարքի արժեքը 3 միլիարդ դոլար է, կամ մեկ ինքնաթիռի համար 200 միլիոն դոլար:
Գրեթե երկու տասնամյակ է անցել գերձայնային Concorde-ի վերջին թռիչքից, որը 1976 թվականին սկսեցին օգտագործել British Airways-ը եւ Air France-ը: Վերջինս շահագործումից հանվել էր 2003 թվականին. Փարիզից թռիչքից անմիջապես հետո Air France Concorde-ը բախվել էր հյուրանոցին, ինչի հետեւանքով զոհվել էին ինքնաթիռում գտնվող բոլոր մարդիկ եւ չորս մարդ` գետնի վրա:
Մի քանի ընկերություն աշխատում է գերձայնային ռեակտիվ նոր շարժիչների վրա, որոնք ավելի արդյունավետ են վառելիքի մասով եւ ավելի քիչ կլիմայական վնասներ են հասցնում, քան Concorde-ը:
Boom-ն աշխատում է 88 տեղանոց Overture-ի ուղղությամբ, որը կլինի առաջին գերձայնային ինքնաթիռը եւ կթռնի այսպես կոչված էկոլոգիապես մաքուր վառելիքով: Շոլն ասել է, որ մեկ երրորդ չափով նախատիպն իր առաջին փորձնական թռիչքը կկատարի այս տարվա վերջին կամ 2022-ի սկզբին:
Դենվերից ընկերությունը հայտարարել է, որ ինքնաթիռն ունակ կլինի ձայնի արագությունը 1.7 անգամ գերազանցող կամ ժամում մոտ 1300 մղոն արագություն բացել: Այն ավելի դանդաղ է, քան Concorde-ը, բայց ավելի քան երկու անգամ արագ է, քան շատ ժամանակակից ինքնաթիռներ:
