«Թալիբան» շարժումն առանց կռվի վերցրել է Աֆղանստանի Ջալալաբադ քաղաքը՝ փաստացի թողնելով միայն մայրաքաղաք Քաբուլը ՝ որպես կառավարության վերահսկողության տակ գտնվող վերջին խոշոր քաղաք, հայտնում է AFP-ն:

Առանցքային արեւելյան քաղաքը, որը նաեւ Նանգարհար նահանգի կենտրոնն է, ընկավ կիրակի վաղ առավոտյան: Դա տեղի ունեցավ թալիբների կողմից հյուսիսային մեծ Մազարի Շարիֆ քաղաքի գրավումից հետո: Կիրակի օրը զինված խումբը համացանցում լուսանկարներ  է տեղադրել Ջալալաբադի նահանգապետի գրասենյակում:

«Մենք այսօր առավոտյան արթնացանք եւ տեսանք Թալիբանի սպիտակ դրոշներն ամբողջ քաղաքում»,- ասել է Ահմադ Վալիի բնակիչը՝ հաստատելով թալիբների հայտարարությունները սոցիալական ցանցերում: «Նրանք մտան առանց կռվի»,- ասել է նա AFP-ին:

Նահանգից պատգամավոր Աբրարուլլահ Մուրադը The Associated Press-ին հայտնել է, որ թալիբները գրավել են Ջալալաբադը այն բանից հետո, երբ ավագանիները պայմանավորվեցին տեղական իշխանությունների հեռացման մասին:

Ջալալաբադից մեկ այլ աֆղան պաշտոնյա Reuters-ին ասել է, որ քաղաքում բախումներ չեն եղել «քանի որ նահանգապետը հանձնվել է թալիբներին»:

Արեւմտյան անվտանգության ծառայությունների աշխատակիցը եւս հաստատել է քաղաքի անկումը եւ ասել, որ դա թույլ է տալիս թալիբներին վերահսկել Աֆղանստանը Պակիստանին կապող ճանապարհները:

«Թալիբան»-ի գրոհայինները շաբաթ օրը, դիմադրության չհանդիպելով, մտել էին Մազարի-Շարիֆ, քանի որ անվտանգության ուժերը փախել էին հարեւան Ուզբեկստան: