նախընտրելի դարձնել
Հայաստանում ստեղծվում են պայմաններ, որոնց համաձայն ծնողները չեն ցանկանում իրենց երեխաներին բանակ ուղարկել: Այս մասին օգոստոսի 23-ին լրագրողների հետ հանդիպմանն ասաց Հայաստանի առաջին օմբուդսմեն, իրավապաշտպան Լարիսա Ալավերդյանը:
Նա նշեց, որ սկզբում ծնողներին ասում էին, որ երեխաները չեն գնա ծառայելու Ղարաբաղ, բայց այժմ խոսքը բանակում այնպիսի մթնոլորտ ստեղծելու մասին է, որ ծնողները ընդհանրապես չցանկանան իրենց երեխաներին այնտեղ ուղարկել: «Որտեղ են այն կազմակերպությունները, որոնք արդարացիորեն բարձրաձայնում էին, երբ բանակում աղաղակող միջադեպեր էին տեղի ունենում մինչ 2018 թվականը»,- տարակուսեց իրավապաշտպանը:
Ալավերդյանն ընդգծեց, որ այսօր Հայաստանը թեւակոխել է ավերումների նոր փուլ, եւ այժմ իշխանությունների ձեռնարկած գործողությունները հավասարազոր են նրան, որ Ադրբեջանին եւ Թուրքիային հրավիրեն հարձակվել Հայաստանի վրա: «Ամեն ինչ նորից արվում է ժողովրդի անունից, եւ բոլոր քայլերն արդարացված են դրանով: Հայաստանի իշխանությունների ձեռնարկած գործողությունները ցույց են տալիս, որ նրանք չեն վերահսկում իրավիճակը: Ի պատասխան, այսպես կոչված, միջանցք բացելու մտադրության մասին Ադրբեջանի սպառնալիքի, նրանք ցուցադրում են անգործունակություն՝ հայտարարելով միայն վճարները: Իսկ որտե՞ղ է բանակը: Ինչու՞ իշխանությունները չեն խոսում դրա ամրապնդման, կամ գոնե այն քայլերի մասին, որոնք կկանխեն զինված ուժերի ոչնչացումը: Բաքուն հստակ ազդանշան է տալիս, որ ցանկանում է, այսպես կոչված, միջանցքը բացել ոչ թե այն պատճառով, որ ցանկանում է կապել Ադրբեջանն ու Նախիջեւանը, այլ Հայաստանի տարածքը բնակեցնել ադրբեջանցիներով»,-հավելեց առաջին օմբուդսմենը` վկայակոչելով թշնամի երկրի նախագահի վերջին հայտարարությունը:
Նա նշեց, որ բանակում սննդի որակի հարցի կարեւորությանը զուգահեռ, Հայաստանի պաշտպանության նախարարը կարող էր միաժամանակ ասել, թե ինչ քայլեր են ձեռնարկվում զինված ուժերի ոչնչացման գործընթացը կասեցնելու համար:
Լարիսա Ալավերդյանը պատահական չհամարեց նաեւ որոշ մարդկանց հայտարարությունները Հայաստանում աֆղանցի փախստականներին ընդունելու հնարավորության մասին: «Ոչ մի երկիր չի ցանկանում գնալ այս քայլին, քանի որ դա սպառնալիք է ներկայացնում ահաբեկչության տարածման տեսքով: Ո՞վ չի հասկանում, որ փախստականների անվան տակ երկիր կարող են մուտք գործել «Թալիբան»-ի անդամները: Ես էլ եմ ցավում իսկական փախստականների համար, բայց սովորաբար այլ երկրներ նրանց չեն ուղարկում: Մեր հասարակությունը բացարձակապես պատրաստ չէ նման փոփոխությունների»,- եզրափակեց նա:
Հիշեցնենք, որ օգոստոսի 19-ին Հայաստանի ԶՈւ զորամասի հարավարեւելյան ուղղությամբ տեղակայված մարտական դիրքում հայտնաբերվել էին 2002թ․ ծնված Մուրադ Աշոտի Մուրադյանի, 2002թ․ ծնված Լեւոն Ռաֆայելի Հարությունյանի եւ 2002թ․ ծնված Գոռ Արտակի Սահակյանի մարմինները՝ հրազենային վնասվածքներով: Հարուցվել է քրեական գործ՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով: Նույն օրը բերման էր ենթարկվել նույն զորամասի ժամկետային զինծառայող:
