նախընտրելի դարձնել
Հայաստանում արհեստական բեղմնավորման եւ վերարտադրողական օժանդակ տեխնոլոգիաների պետական ծառայություններից օգտվել է 426 շահառու։ Միաժամանակ նախորդ տարվա դրությամբ ծնվել է 75 երեխա։ Այս մասին ԱԺ Մարդու իրավունքների եւ հանրային հարցերի մշտական հանձնաժողովի նիստում ասաց առողջապահության նախարար Անահիտ Ավանեսյանը։
Նա նշեց, որ արհեստական բեղմնավորման շնորհիվ երկրում գրանցվել է հղիության 188 դեպք։ Ավանեսյանի խոսքով՝ սա մեծ ձեռքբերում է։ «2021թ․ գործում են «Վերարտադրողական առողջության մասին» օրենքի նոր դրույթները։ Ավելին, 2021թ․ մեկնարկել է կրծքագեղձի քաղցկեղի սքրինինգային ծրագիր, որի շնորհիվ հետազոտվել է 6961 կին։ Նախագիծը կիրականացվի նաեւ Տավուշի, Լոռու եւ Սյունիքի մարզերում»,- ասաց նախարարը։
Առողջապահության նախարարության որոշմամբ ծրագիրը կշարունակվի։ Ցուցակում հաջորդը կլինի Շիրակի մարզը։
«Սա ամենակարեւոր ծրագիրն է։ Քաղցկեղի վաղ հայտնաբերման շնորհիվ պացիենտները ամբողջովին վերականգնվում են։ Կանայք պահպանում են նաեւ իրենց վերարտադրողական առողջությունը»,- ընդգծեց Անահիտ Ավանեսյանը։
