Եվրամիությունը պետք է խուսափի հանածո վառելիքից բազմամյա կախվածությունից, քանի որ ձգտում է ռուսական նավթն ու գազը փոխարինել այլ երկրներից մատակարարումներով, ասվում է ԵՄ 11 նախկին քաղաքական առաջնորդների նամակում՝ ուղղված դաշինքի ներկայիս ղեկավարությանը, հայտնում է Reuters-ը։

Եվրահանձնաժողովը մայիսին կհրապարակի ռուսական էներգակիրներից Եվրոպայի կախվածությունը դադարեցնելու ծրագրերը, որոնք, ինչպես ակնկալվում է, կնպաստեն վերականգնվող էներգիայի զարգացմանը` միաժամանակ խրախուսելով ռուսական գազի հրատապ փոխարինումն այլընտրանքային աղբյուրներով:

«Հանածո վառելիքի ներմուծման ուղղակի դիվերսիֆիկացումը կօգնի ԵՄ-ի էներգիան կախվածության մեջ պահել այլ երկրներից, որոնցից շատերը չեն հարգում ԵՄ արժեքները»,- հայտարարել են նախկին պաշտոնյաները՝ Եվրահանձնաժողովի նախագահ Ուրսուլա ֆոն դեր Լյայենին եւ ԵՄ կլիմայի հարցերով ղեկավար Ֆրանս Թիմերմանսին ուղղված նամակում:

Նամակում ասվում է, որ նավթի եւ գազի վրա երկարաժամկետ կենտրոնանալու փոխարեն՝ Բրյուսելին անհրաժեշտ է արտակարգ իրավիճակների ծրագիր՝ հանածո վառելիքի օգտագործումը կտրուկ նվազեցնելու համար՝ կլիմայի փոփոխության դեմ պայքարելու, ցածր ածխածնային տեխնոլոգիաներին անցնելու եւ աշխատողներին նոր կանաչ մասնագիտություններ սովորեցնելու համար։

Հանձնաժողովը պետք է նաեւ ավելի հավակնոտ թիրախներին աջակցելու վերլուծություն ներկայացնի՝ վերականգնվող էներգիայի օգտագործումը ընդլայնելու, շենքերը վերանորոգելու եւ աղտոտող մեքենաները աստիճանաբար հեռացնելու համար: Հանձնաժողովը հայտարարել է, որ վերանայում է վերականգնվող էներգիայի ավելի բարձր թիրախները:

Ռուսաստանը մատակարարում է ԵՄ գազի 40 տոկոսը եւ նավթի 26 տոկոսը, որոնք ապահովում են տների ջեռուցումը, տրանսպորտը եւ արդյունաբերությունը ողջ Եվրոպայում։

Այս վառելիքի փոխարինման հրատապ անհրաժեշտությունը սրվել է այն բանից հետո, երբ Մոսկվան անցած շաբաթ դադարեցրել է գազի մատակարարումը Լեհաստանին եւ Բուլղարիային՝ մտավախություն առաջացնելով, որ մյուս երկրները կարող են լինել հաջորդը:

Նախկին պաշտոնյաները հայտարարել են, որ գազի մատակարարման նոր պայմանագրերը պետք է ունենան ժամանակային սահմանափակումներ՝ տասնամյակներով արտանետումները չֆիքսելու համար:

Նամակը ստորագրողների թվում են կլիմայի հարցերով ԵՄ նախկին հանձնակատար Քոնի Հեդեգարդը, ԵՄ նախկին հանձնակատար եւ Առեւտրի համաշխարհային կազմակերպության գլխավոր տնօրեն Պասկալ Լամին եւ Իտալիայի նախկին վարչապետ Ռոմանո Պրոդին, որը 2000-ականների սկզբին Եվրահանձնաժողովի նախագահն էր։