նախընտրելի դարձնել
ՆԱՏՕ-ի գլխավոր քարտուղար Յենս Սթոլթենբերգը բարձր է գնահատել Շվեդիայի եւ Ֆինլանդիայի՝ դաշինքին միանալու հետ կապված Թուրքիայի «մտահոգությունների» վերացմանն ուղղված երկու երկրների քայլերը։
Թուրքիան արգելափակում է Շվեդիայի եւ Ֆինլանդիայի անդամակցությունը ՆԱՏՕ-ին՝ նրանց մեղադրելով քուրդ ապստամբներին աջակցության մեջ, որոնց ահաբեկիչներ է համարում։ Անկարան երկու երկրներից պահանջում է նաեւ վերացնել զենքի մատակարարման էմբարգոն։
«Ես ողջունում եմ արդեն իսկ ձեռնարկված լուրջ քայլերը Թուրքիայի խնդիրների լուծման համար, այդ թվում՝ ՔԱԿ-ի դեմ պայքարում,- ասել է Սթոլթենբերգը Հաագայում (Նիդեռլանդներ):- Մեր երկխոսությունը շարունակվում է՝ առաջընթացի միասնական ուղի գտնելու համար»։
Սթոլթենբերգը ելույթ է ունեցել ՆԱՏՕ-ի անդամ Նիդեռլանդների, Դանիայի, Ռումինիայի, Բելգիայի, Լեհաստանի, Պորտուգալիայի եւ Լատվիայի հետ հանդիպումից հետո Հաագայում Նիդեռլանդների վարչապետ Մարկ Ռութի պաշտոնական նստավայրում ոչ պաշտոնական հանդիպման ժամանակ:
Associated Press-ի տվյալներով՝ նրանք բոլորն աջակցություն են հայտնել Շվեդիայի եւ Ֆինլանդիայի՝ դաշինքին անդամակցությանը:
Թուրքիայի պետական Anadolu լրատվական գործակալությունը հայտնել է, որ Թուրքիան հունիսի 28-ին Մադրիդում քննարկում կանցկացնի՝ Շվեդիայի եւ Ֆինլանդիայի՝ ՆԱՏՕ-ին անդամակցելու հայտերի վերաբերյալ իր առարկությունները բացատրելու համար: Ուրբաթ Բրյուսելում նախատեսվում է այս հարցի շուրջ հերթական քննարկումը։
