նախընտրելի դարձնել
Հաջորդ սերնդի միջուկային ռեակտորի նախագիծը, որին աջակցում են Բիլ Գեյթսը եւ ԱՄՆ էներգետիկայի նախարարությունը, փակուղի է մտել, քանի որ Ռուսաստանը նրան անհրաժեշտ ուրանի միակ աղբյուրն է, գրում է Business Insider-ը։
Նախագծի ետեւում կանգնած TerraPower ընկերությունն առնվազն երկու տարով հետաձգել է իր առաջատար ռեակտորի գործարկումը՝ Մոսկվայի դեմ արեւմտյան պատժամիջոցների հետեւանքների պատճառով:
Գործադիր տնօրեն Քրիս Լեւեսկը հայտարարել է, որ պատերազմը հարված է հասցրել ցածր հարստացված բարձրորակ ուրանի կամ HALEU-ի մատակարարմանը: Սա նշանակում է, որ Natrium ատոմակայանը, որը TerraPower-ը կառուցում է Վայոմինգում, չի գործարկվի 2028 թվականին, ինչպես նախատեսված էր։
«2022 թվականի փետրվարին Ուկրաինա Ռուսաստանի ներխուժումը հանգեցրել է նրան, որ HALEU վառելիքի միակ կոմերցիոն աղբյուրն այլեւս դադարել է TerraPower-ի, ինչպես նաեւ մեր արդյունաբերության այլ ընկերությունների մատակարարման շղթայի կենսունակ մասը լինել»,- ասել է Լեւեսկը:
Նրա խոսքով՝ ամերիկյան արտադրողներին առեւտրային արտադրության մեջ գրավելու եւ այլընտրանքային մատակարարներ գտնելու ջանքերը հաջողությամբ չեն պսակվել: «Հաշվի առնելով վառելիքի ներկայիս պակասը եւ այն փաստը, որ վառելիքի հարստացման նոր կայանների շինարարությունը չի սկսվել, TerraPower-ը ակնկալում է առնվազն երկու տարով հետաձգում՝ Natrium ռեակտորը շահագործման հանձնելու համար»,- հավելել է Լեւեսկը:
Գեյթսն օգնել է ստեղծել TerraPower-ը 2006 թվականին եւ այդ ժամանակվանից դրա նախագահն է։ Ընկերությունն ասել է, որ իր նպատակը աշխարհին միջուկային էներգիայի ավելի մատչելի, ավելի անվտանգ եւ էկոլոգիապես մաքուր ձեւ տրամադրելն է:
Ակնկալվում է, որ դրա Natrium նախագիծը կարժենա 4 միլիարդ դոլար, որի ֆինանսավորման մոտ կեսը կտրամադրվի ԱՄՆ էներգետիկայի նախարարության կողմից:
TerraPower-ը նախատեսում է օգտագործել նատրիումը որպես HALEU-ի վառելիք, որն ունի հարստացման ավելի բարձր մակարդակ, քան 5 % հարստացված ուրան-235-ը, որն օգտագործվում է արդեն իսկ գործող ԱՄՆ միջուկային ռեակտորներում:
Ըստ Լեւեսկի, ընկերությունը ենթադրում էր, որ կօգտագործի ռուսական մատակարարումները առաջին հիմնական բեռի համար, քանի որ ԱՄՆ-ը ներկայումս չունի ուրան-235-ի հարստացման հզորություններ:
Սակայն պատերազմը դադարեցրել է վառելիքի աղբյուրը այն բանից հետո, երբ ԱՄՆ-ը, ԵՄ-ն եւ արեւմտյան մյուս դաշնակիցները պատժամիջոցներ են սահմանել Մոսկվայի դեմ:
Լեւեսկի խոսքով՝ TerraPower-ը եւ էներգետիկայի նախարարությունը ներկայումս ուսումնասիրում են HALEU-ի այլընտրանքային աղբյուրները եւ ցանկանում են, որ օրենսդիրները հաստատեն 2,1 միլիարդ դոլար արժողությամբ ֆինանսավորման փաթեթը՝ ԱՄՆ ցածր հարստացված ուրանի արտադրության աջակցության համար:
