նախընտրելի դարձնել
Քանի որ ՆԱՏՕ-ի դաշնակիցները Ուկրաինային աջակցելու հարցում միասնություն են ցուցաբերում, Գերմանիայի եւ Լեհաստանի միջեւ տարաձայնությունը կարող է խաթարել Կիեւի զորքերին մատակարարման համատեղ ջանքերը, գրում է Bloomberg-ը:
«Վարշավայի եւ Բեռլինի միջեւ հրթիռների, տանկերի եւ պահեստամասերի շուրջ վեճերը հասել են նոր մակարդակի, նույնիսկ այն դեպքում, երբ նախագահ (Ուկրաինայի – խմբ.) Վոլոդիմիր Զելենսկին արեւմտյան կողմնակիցներին կոչ է անում «շտապել» զենքի մատակարարման հարցում՝ նախքան գարնանային հարձակման մեկնարկը», - նշում է գործակալությունը։
Միաժամանակ, Լեհաստանի իշխանությունները Գերմանիային մեղադրում են Ուկրաինային տանկերի մատակարարման հարցում ուշացումների համար։
«Հիմնական պատասխանատվությունը կրում է Գերմանիայի Դաշնային Հանրապետությունը՝ այդ տանկերի հիմնական արտադրողը», - ասել է Լեհաստանի նախագահ Անջեյ Դուդան։
Ավելի ուշ Լեհաստանում Գերմանիայի դեսպան Թոմաս Բագերը պատասխանել է Լեհաստանի պաշտպանության նախարար Մարիուշ Բլաշչակի քննադատությանը, ով Գերմանիային մեղադրել է «Ուկրաինայի դեմ Ռուսաստանի պատերազմը ֆինանսավորելու» հարցում։ Նա նշել է, որ Լեհաստանը նույնպես միլիարդներ է ծախսել ռուսական էներգակիրների ներկրման վրա։
«Անկասկած, Գերմանիայի քաղաքականությունն էր, որ օգնեց Պուտինին ստանալ այն գումարները, որոնք նա օգտագործեց իր բանակն ուժեղացնելու համար», - պետական հեռուստատեսությանը տված հարցազրույցում ասել է պաշտպանության նախարար Մարիուշ Բլաշչակը․ «»Հյուսիսային հոսք»-ը դրա օրինակն է... Չնայած մեզ ռուսաֆոբ էին անվանում, մենք զգուշացրել էինք դրա մասին»:
Ի պատասխան Բլաշչակի հարցազրույցի, Գերմանիայի դեսպան Թոմաս Բագերը իր թվիթերյան միկրոբլոգում լեհերենով գրառում է կատարել. «Նախարարը գիտի՞, թե տարեկան քանի միլիարդ զլոտի է փոխանցել Լեհաստանը Մոսկվային՝ ռուսական էներգիայի դիմաց»:
Հունվարի վերջին Գերմանիայի կանցլեր Օլաֆ Շոլցը որոշել է Ուկրաինային Leopard մարտական տանկեր մատակարարել։
Գերմանիայի ընդդիմությունը ողջունել է կառավարության որոշումը, սակայն միեւնույն ժամանակ կանցլերին մեղադրել է անվճռականության եւ երկարատեւ տատանումների համար։
