Այս շաբաթ միլիարդատեր Իլոն Մասկի փաստաբանները հայց են ներկայացրել իրավաբանական այն ընկերության դեմ, որը ներկայացնում էր Twitter-ի շահերը, երբ Մասկը փորձում էր ընկերությունը մասնավորեցնել անցյալում՝ հավաստիացնելով, որ ընկերությունը չափից մեծ վճար է վերցրել իր աշխատանքի դիմաց, տեղեկացրել է CNBC-ն։

Wachtell, Lipton, Rosen, and Katz ընկերությունը, որը ներկայացնում էր Twitter-ի շահերը մինչեւ Մասկի կողմից ձեռք բերվելը, ներկայացրել է 90 մլն դոլարի հաշիվ «վերջին պահին»։

Wachtell-ը ներկայացրել է Twitter-ի շահերն այն բանից հետո, երբ Մասկը հրաժարվել է Twitter-ը 44 մլրդ դոլարով մասնավոր ընկերություն դարձնելու իր որոշումից։ Իրավաբանական ընկերությունն օգնել է փակել գործարքը 2022թ. նոյեմբերին եւ ստացել է 90 մլն դոլարի հոնորար գործարքի ապահովման համար։

Twitter-ի հոլդինգային X Corp. ընկերությունը պահանջում է վերադարձնել այդ ավելորդ հոնորարը։ Մասկի ընկերությունը ներկայացնում է Reid Collins & Tsai-ն՝ ընկերություն, որը գտնվում է  Օսթինում (Տեխասի նահանգ)։

Մասկն արդեն քանիցս փորձում է խանգարել Twitter-ի մատակարարներին ստանալ փողը, նշել են ԶԼՄ-ները։ Այն բանից հետո, երբ Մասկն սկսեց գլխավորել Twitter-ը՝ 13 մլրդ դոլարի պարտքով բեռնելով նրան, ընկերությանը դատի են տվել առնվազն 26 անգամ մատակարարներին վճարելու համար, վկայում են Plainsite-ի իրավաբանական փաստաթղթերը։ Ընկերությունը դադարել է վճարել Սան Ֆրանցիսկոյի կենտրոնատեղիի վարձը, հրաժարվել է վճարել Google-ին իր ամպային ենթակառուցվածքն օգտագործելու համար։

Վերջին հայցը ներկայացվել է ԱՄՆ առաջատար իրավաբանական ընկերություններից մեկի դեմ։ Wachtell-ը, որը ներկայացրել է տասնյակ ընկերությունների եւ ներդրումային ֆոնդերի շահերը նման գործարքներում, Twitter-ին առաջարկել է իր ներկայացուցչությունը 2022թ. հունիսին։