Ավստրիայում բանավեճ է ընթանում այն ​​տան վերակառուցման  ծրագրի շուրջ, որտեղ ծնվել է Ադոլֆ Հիտլերը։ Իշխանությունները մտադիր են այնտեղ ոստիկանների համար ուսումնական կենտրոն ստեղծել։ Շատերը դեմ են դրան, քանի որ դա Հիտլերի երազանքն է եղել։ Այս մասին հայտնում է Euronews-ը։

Ավստրիական Բրաունաուում գտնվող տունը, որտեղ ծնվել և վաղ մանկության տարիներին ապրել է Ադոլֆ Հիտլերը, շարունակում է գլխացավանք մնալ իշխանությունների համար։ Շենքի վերակառուցման մեկնարկից մեկուկես ամիս էլ չանցած   քաղաքապետարանը բախվել է հասարակության մի մասի բողոքին։ Մարդիկ ահազանգում են, որ դե ֆակտո կատարվում է Հիտլերի կամքը։

«Տան վերաբերյալ մեր որոշումը նվազագույն չափով իսկ չպետք է արտահայտի նրա կամքը»,- նկատել է  ռեժիսոր Գյունտեր Շվայգերը։ Իր վավերագրական ֆիլմի համար, որը  ցուցադրվելու է տան դարպասների մոտ, նա  արխիվային նյութեր է ուսումնասիրել և գտել Հիտլերի ուղիղ հրահանգը, որ իր տոհմական տունը պետք է ծառայի պետությանը։

Իշխանություններն իրենց հերթին նշում են, որ առանձնատան վերանորոգումը խորհրդանշական ժեստ է դառնալու։ Վերակառուցումը պետք է սկսվի հոկտեմբերին և ավարտվի 2025 թվականին, այն  կարժենա 20 մլն եվրո։