նախընտրելի դարձնել
Կիրակի օրը Բուլղարիայի տարածքի մեծ մասում փոթորկոտ քամիների, հորդառատ անձրևների ու ձյան հետանքով երկու մարդ զոհվել է, լուրջ վնասներ է պատճառվել և խաթարվել է էլեկտրամատակարարումը քաղաքներում և գյուղերում, հայտնում է AP-ն՝ վկայակոչելով տեղական իշխանություններին:
Արևելյան Բուլղարիայի բնակիչները, որոնք ամենաշատն են տուժել փոթորկից, ասում են, որ երբեք ակյսպիսի եղանակ չեն տեսել:
Սևծովյան Վառնա քաղաքում արտակարգ դրություն է հայտարարվել, պաշտոնյաները հայտնել են, որ եղանակային արտակարգ պայմանները լուրջ վտանգ են ներկայացնում բնակչության համար։ Նավահանգստային քաղաքը ենթարկվել է բուռն քամիների և ձնախառն հորդառատ անձրևների ազդեցությանը։
Քաղաքապետարանը հայտնել է, որ էլեկտրամատակարարումը խափանվել է Վառնայի բոլոր շրջաններում, առանցքային ճանապարհները փակվել են տապալված ծառերի ու ճյուղերի պատճառով, ինչի հետևանքով մեքենաներն արգելափակվել են: Քաղաքապետարանը քաղաքացիներին կոչ է արել մնալ տանը և չօգտվել սեփական մեքենաներից, բացառությամբ արտակարգ դեպքերի։
Վառնայի միջազգային օդանավակայանը բաց է, սակայն թռիչքները հետաձգվել և չեղարկվել են, հայտնել են օդանավակայանի պաշտոնյաները:
Շաբաթ օրը ոստիկանությունը հայտնել է, որ մի տղամարդ է զոհվել, մեքենայով բախվելով մայրաքաղաք Սոֆիայի գլխավոր զբոսայգում տապալված ծառին, իսկ Վառնայում մի կին է ակնթարթորեն մահացել՝ ընկած ծառի ճյուղի հարվածից:
Բուլղարացի օդերևութաբանները վտանգավոր եղանակի մասին նախազգուշացումներ են արել արևելյան Բուլղարիայի մեծ մասի համար: Սպասվում է, որ ջերմաստիճանի նվազման պատճառով հորդառատ անձրևները կվերածվեն ձյան:
