Առաջիկա օրերին Եվրահանձնաժողովը Ուկրաինային կփոխանցի ևս 1,5 միլիարդ եվրոյի մակրոֆինանսական օգնություն։ Ինչպես հայտնում է UNIAN-ի թղթակիցը, այս մասին հայտարարել է Եվրահանձնաժողովի նախագահ Ուրսուլա ֆոն դեր Լյայենը Բրյուսելում Եվրոպական խորհրդի երկօրյա նիստի արդյունքներով մամուլի ասուլիսում։

Նա նշել է, որ համառ աշխատանք է տարվում Ուկրաինայի ֆինանսավորման ուղղությամբ, մասնավորապես, դա վերաբերում է յուրաքանչյուր մասնաբաժնի փոխանցմանը։  

«Առաջիկա օրերին մենք կփոխանցենք վերջին 1,5 միլիարդ եվրոն, որը տրամադրվել է այս տարվա համար Ուկրաինային և համաձայնեցվել է որպես 2023 թվականի մակրոֆինանսական օգնության փաթեթի մաս»,-  ընդգծել է ֆոն դեր Լյայենը։ 

Ըստ նրա, այդ միջոցները կօգնեն Ուկրաինայի ֆինանսական կարիքների բավարարմանը 2024 թվականի սկզբին։