ԱՄՆ նախագահ Ջո Բայդենը շաբաթ օրը ստորագրել է Սենատի հավանությանն արժանացած 460 միլիարդ դոլար գումարի ծախսերի մասին օրինագծերի փաթեթը, որպեսզի խուսափի դաշնային բազմաթիվ առանցքային գործակալությունների փակումից, հայտնում է AP-ն։

Օրինագծի հաջողությունը օրենսդիրներին մոտեցնում է 2024 թվականի բյուջետային տարվա համար ասիգնացիաների հատկացման աշխատանքի ավարտին:

Միջոցառումը պարունակում է տարեկան ծախսերի վեց օրինագիծ և արդեն անցել է Ներկայացուցիչների պալատով: Այն, որպես օրենք, ստորագրելիս Բայդենը շնորհակալություն է հայտնել երկու պալատների երկու կուսակցությունների առաջնորդներին և բանակցողներին իրենց աշխատանքի համար, ինչը, ըստ Սպիտակ տան հայտարարության, նշանակում է, որ գործակալությունները «կարող են շարունակել իրենց բնականոն գործունեությունը»:

Միևնույն ժամանակ, օրենսդիրները բանակցում են վեց օրինագծից բաղկացած երկրորդ փաթեթի շուրջ, ներառյալ պաշտպանական օրինագիծը, փորձելով ապահովել բոլոր դաշնային գերատեսչությունների լիարժեք ֆինանսավորումը մինչև մարտի 22-ի վերջնաժամկետը:

«Մարդկանց համար, որոնք անհանգստանում են, որ պառակտված կառավարությունը ենթադրում է, որ ոչինչ երբեք չի արվի, այս երկկուսակցական փաթեթն այլ բան է վկայում»,- հայտարարել է  Սենատի մեծամասնության առաջնորդ, դեմոկրատ Չակ Շումերը:

Նա ասել է, որ օրինագիծը, ի թիվս այլոց, հնարավորություն կտա ավելի շատ ավիակարգավարներ և երկաթուղային տրանսպորտի անվտանգության տեսուչներ վարձել, բարձրացնել դաշնային հրշեջների աշխատավարձը և մեծացնել անօթևան վետերանների աջակցությունը: