Նախընտրելի«Նաիրիտի» կառավարման համար հայտեր են ստացվել գերմանական CSC ընկերությունից եւ ռուսական «Իտերա» հոլդինգից: Այս մասին այսօր` նոյեմբերի 16-ին Ազգային ժողովում ասաց ՀՀ էներգետիկայի եւ բնական պաշարների նախարար Արմեն Մովսիսյանը:
Ավելի վաղ վարչապետ Տիգրան Սարգսյանը հայտարարել էր, որ ձեռնարկության օպերատոր ընկերության համար բանակցություններ են վարվում գերմանական մի ընկերության հետ:
«Այս երկու ընկերություններն էլ քիմիական արդյունաբերության մեջ մեծ փորձ ունեն եւ հնարավորություն` իրականացնելու ձեռնարկության առջեւ դրված խնդիրները»,-նշեց նախարարը: Հիշեցնենք, որ «Իտերան» ավելի վաղ «ՀայՌուսգազարդի» բաժնետերն էր: 2009 մարտին «Իտերան» իր փաթեթը վաճառեց «Գազպրոմին»` «ՀայՌուսգազարդի» մայր ընկերությանը:
«Նաիրիտի» կառավարող ընկերության պատասխանատվության շրջանակում կլինեն ձեռնարկության արդիականացումն ու նոր սարքավորումների ձեռքբերումների: «Պետք է խոստովանել, որ ներկայիս գծերի վրա արտադրվող արտադրանքը մրցունակ չէ արտաքին շուկայում»,-նշեց նախարարը:
Հիշեցնենք, որ ձեռնարկության զարգացման ծրագրով վերջինիս հաջող գործարկման համար անհրաժեշտ է 512մլն դոլարի ներդրում: Ներկայումս ԵվրԱզԷսի հակաճգնաժամային հիմնադրամի քննարկմանն է ներկայացվել «Նաիրիտի» վարկային հայտը, որը ինչպես հաղորդվել էր, կարող է կազմել 300 մլն դոլար:
