Երեք պորտուգալացի հրշեջներ մահացել են երեքշաբթի երկրի կենտրոնական և հյուսիսային շրջաններում բռնկված տասնյակ անտառային հրդեհներից մեկում: Շաբաթ օրվանից ի վեր վերջին անտառային հրդեհների զոհերի թիվը հասել է յոթի, հայտնել է Reuters-ը։

Պորտուգալիան պայքարում է մայրցամաքում ավելի քան 50 գործող անտառային հրդեհների դեմ և մոբիլիզացրել է մոտ 5300 հրշեջների և օգնություն խնդրել Եվրոպական միությունից:

Իշխանությունները փակել են մի քանի մայրուղիներ, ներառյալ Լիսաբոնն ու Պորտուն կապող գլխավոր մայրուղու մի հատվածը, և հյուսիսային Պորտուգալիայի երկու գնացքների գծերով դադարեցրել են երկաթուղային հաղորդակցությունը:

ANEPC քաղաքացիական պաշտպանության հրամանատար Անդրե Ֆերնանդեսը լրագրողներին հայտնել է, որ Վիլ:ա Նովա  դե Օլիվեյրինյա հրշեջ ջոկատի երեք հրշեջներ զոհվել են Լիսաբոնից մոտ 300 կմ հյուսիս-արևելք ընկած Նելաս քաղաքում հրդեհը հանգցնելիս:

Միայն Ավեյրոյում վերջին երկու օրվա ընթացքում հրդեհներն ընդգրկել են ավելի քան 10 հազար հեկտար անտառներ և թփուտներ: Ֆերնանդեսը երկուշաբթի ուշ երեկոյան հայտնել է, որ Ավեյրոյում հրդեհները կարող են ընդգրկել ևս 20 հազար հեկտար:

Հանգստյան օրերին ամբողջ երկրում ջերմաստիճանը գերազանցել է 30 աստիճանն ըստ Ցելսիուսի, քանի որ առաջին անգամ բռնկվել են հրդեհներ, որոնք առաջացել են ուժեղ քամիներից:

Օդերևութաբանական IPMA գործակալությունը կանխատեսում է, որ առաջիկա երկու օրերին ջերմաստիճանը կպահպանվի 30C-ից բարձր՝ չափազանց ցածր խոնավության պայմաններում։