Էդինբուրգի նիստերի դատարանը դադարեցրել է նավթի և գազի երկու խոշոր հանքավայրերի՝ Rosebank-ի և Jackdaw-ի շահագործումը Շոտլանդիայում, քանի որ դրանց սեփականատերերը չեն տրամադրել լիարժեք տեղեկատվություն նախագծերի հետևանքով շրջակա միջավայրին հասցվող վնասի մասին: Այս մասին ասված է դատավոր Էնդրյու Ստյուարտի որոշման մեջ։

Նրա խոսքով՝ Բրիտանիայի նախորդ պահպանողական կառավարությունը գործել է անօրինական, երբ արտոնագրեր է տվել այս հանքավայրերի յուրացման համար՝ առանց այդ քայլի՝ շրջակա միջավայրի վրա ազդեցության մանրամասն վերլուծության: Ստյուարտը նշել է, որ նավթի և գազի արդյունահանումը Rosebank-ում և Jackdaw-ում հնարավոր չի լինի այնքան ժամանակ, քանի դեռ հորատանցքերի սեփականատեր ընկերությունները նոր թույլտվություն չեն ստացել կարգավորող մարմնից: Հայցը ներկայացրել են Greenpeace և Uplift բնապահպանական խմբերը։

Jackdaw գազի հանքավայրի զարգացման նախագիծը, որը գտնվում է Աբերդինի ափից 240 կմ դեպի արևելք, տրվել է Մեծ Բրիտանիայի կառավարության և Հյուսիսային ծովի անցումային մարմնի կողմից 2022 թվականին: Ինչպես ընդգծել է BBC-ն՝ Հյուսիսային ծովի այս հանքավայրը կարող է ապահովել Միացյալ Թագավորությունում գազի արդյունահանման 6,5%-ը։ Shell-ը նախատեսում էր սկսել Jackdaw-ի մշակումը 2026 թվականին:

Հյուսիսային Ատլանտյան օվկիանոսի Շեթլանդյան կղզիներից մոտավորապես 130 կմ դեպի արևմուտք գտնվող Rosebank-ի յուրացման թույլտվությունը տրվել է 2023 թվականին: Նախնական հաշվարկներով՝ սա երկրի ամենամեծ չմշակված նավթահանքն է՝ մինչև 500 մլն բարել պաշարներով։ Նորվեգական Equinor էներգետիկ ընկերությունը Rosebank-ի բաժնետոմսերի 80%-ի սեփականատերն է, իսկ մնացած մասը պատկանում է Աբերդինում գտնվող Ithaca Energy-ին: Սպասվում էր, որ արտադրությունը կսկսվի 2027 թվականից ոչ ուշ։

Ստյուարտի որոշման մեջ ասվում է, որ թվարկված ընկերությունները պետք է հաշվետվություն ներկայացնեն իրենց նախագծերի պատճառած բնապահպանական վնասների մասին՝ հաշվի առնելով ոչ միայն նավթի և գազի ուղղակի արդյունահանման արտանետումները, այլև հանածո վառելիքի այրման արդյունքում արտանետվող ջերմոցային գազերը: «[Նախկինում տրված] թույլտվությունները կչեղարկվեն, սակայն լիցենզիաները կարող են վերաթողարկվել՝ հաշվի առնելով արտանետումները»,- ասել է դատավորը։ Բնապահպան ակտիվիստները ողջունել են դատարանի որոշումը։