նախընտրելի դարձնել
Միացյալ Նահանգները չեղյալ է հայտարարել «Թալիբան» շարժման երեք բարձրաստիճան գործիչների որոնման համար սահմանված պարգևավճարները, ներառյալ ներքին գործերի նախարարին, որը նաև հզոր ցանց է ղեկավարում, և մեղադրվում է Արևմուտքի կողմից հովանավորվող Աֆղանստանի նախկին կառավարության վրա արյունալի հարձակումների մեջ, հաղորդում է Associated Press-ը՝ վկայակոչելով Քաբուլի աղբյուրները:
Սիրաջուդին Հաքանին, որը խոստովանել է, որ նախապատրաստել է 2008 թվականի հունվարին Քաբուլի «Սերենա» հյուրանոցի վրա հարձակումը, որի հետևանքով զոհվել է վեց մարդ, այդ թվում՝ ԱՄՆ քաղաքացի Թոր Դևիդ Հեսլան, այլևս նշված չէ Պետքարտուղարության «Պարգևներ արդարության համար» կայքում: Սակայն կիրակի օրը ՀԴԲ-ի կայքում դեռևս նրա հետախուզման մասին հայտարարություն կար:
Աֆղանստանի ներքին գործերի նախարարության խոսնակ Աբդուլ Մաթին Քանին հայտարարել է, որ ԱՄՆ կառավարությունը չեղյալ է հայտարարել Սիրաջուդին Հաքանիին, Աբդուլ Ազիզ Հաքանիին և Յահյա Հաքանիին բռնելու համար նախատեսված պարգևը։
Հաքանիների ընտանիքը, ԱՄՆ-ի ղեկավարությամբ 2001 թվականին Աֆղանստան ներխուժելուց հետո, «Թալիբան» շարժման ամենամահաբեր ստորաբաժանումներից մեկն է դարձել:
Խմբավորումն օգտագործել է ճանապարհեզրի ռումբեր, մահապարտ ահաբեկիչների պայթեցումներ և այլ հարձակումներ, այդ թվում՝ Հնդկաստանի և ԱՄՆ դեսպանատների, Աֆղանստանի նախագահի գրասենյակի և այլ խոշոր օբյեկտների վրա: Նրանք նաև կապված են շորթման, մարդկանց առևանգման և այլ հանցավոր գործունեության հետ:
