նախընտրելի դարձնել
ԱՄՆ նախագահ Դոնալդ Թրամփը վստահ է, որ Չինաստանի նախագահ Սի Ծինփինի հետ հեռախոսազրույցը կօգնի լուծել առեւտրային տարաձայնությունները եւ վերսկսել բանակցությունները, հաղորդել է Politico-ն՝ հղում կատարելով իր աղբյուրներին։
ԱՄՆ առաջնորդը «տարված է Սի Ծինփինի հետ հեռախոսազրույցի մտքով» եւ համոզված է, որ կարող է անձամբ լուծել աշխարհի երկու խոշորագույն տնտեսությունների միջեւ առկա խոր տարաձայնությունները, հայտնել է աղբյուրներից մեկը։ «Թրամփը կարծում է, որ հեռախոսազրույցը «թույլ կտա անցնել [առեւտրային հարցերի շուրջ բարձրացված] աղմուկի միջով եւ հասնել հարցի բուն էությանը»,- պարբերականը մեջբերել է Թրամփի՝ Սպիտակ տանը մոտ կանգնած նախկին պաշտոնյայի խոսքերը։
Ավելի վաղ Սպիտակ տան Ազգային տնտեսական խորհրդի ղեկավար Քեւին Հասեթը հայտնել էր, որ երկու պետությունների ղեկավարների միջեւ հեռախոսազրույցը կարող է տեղի ունենալ մեկ շաբաթվա ընթացքում։ Նա նշել էր, որ «երկու կողմերն էլ» հետաքրքրված են զրույցով։ Մայիսի 30-ին Թրամփը վստահություն էր հայտնել, որ Սի Ծինփինի հետ հեռախոսազրույցը կկայանա, եւ որ նրանք կկարողանան լուծել առեւտրային ոլորտում առկա տարաձայնությունները։
Թերթը նշել է, որ որոշ դիտորդներ դեռեւս կասկածում են, որ Թրամփը կկարողանա կապ հաստատել Սի Ծինփինի հետ: Թերթը նշել է, որ հնարավոր է, որ առաջնորդների միջեւ հեռախոսազրույցը «կարող է հակառակ ազդեցություն ունենալ Թրամփի համար»՝ բացասաբար անդրադառնալով ԱՄՆ-ի եւ Չինաստանի միջեւ երկարաժամկետ առեւտրային հարաբերությունների վրա:
