Նախընտրելի
Զամբիայի կառավարությունը վերջին պահին ներկայացրել է իրավաբանական փաստաթղթեր՝ նախկին նախագահ Էդգար Լունգուի մասնավոր հուղարկավորությունը Հարավային Աֆրիկայում կանխելու համար, ինչը Լունգուի ընտանիքի անդամներին ստիպել է դատարան ներկայանալ սգո սեւ հագուստով, հաղորդել է Associated Press-ը։
Հարավային Աֆրիկայի մայրաքաղաք Պրետորիայում լսումները սկսվել են Լունգուի հուղարկավորությունից մոտ մեկ ժամ առաջ։
Հայտնի չէ, թե երբ կորոշի դատավորը կամ արդյոք նախկին առաջնորդին կկարողանան թաղել։ Մինչդեռ, մոտ 60 կիլոմետր հեռավորության վրա գտնվող Յոհաննեսբուրգի եկեղեցում հուղարկավորության արարողությանը մասնակցելու համար սգացողներ են ժամանել։
Դատական հայցը Լունգուի ընտանիքի եւ Զամբիայի կառավարության միջեւ գրեթե մեկ ամիս տեւած վեճի վերջին զարգացումն է՝ կապված նախկին առաջնորդի թաղման վայրի եւ ձեւի հետ։ Զամբիայի կառավարությունը ցանկանում է, որ Լունգուի հուղարկավորությունը տեղի ունենա նրա հայրենի երկրում, ինչը Լունգուի ընտանիքը թույլ չի տվել՝ Զամբիայի ներկայիս նախագահ Հաքաինդե Հիչիլեմայի հետ նրա դաժան քաղաքական թշնամանքի պատճառով:
Լունգուն, որը Զամբիայի ղեկավարն էր 2015-2021թթ., մահացել է անհայտ հիվանդությունից Հարավային Աֆրիկայի հիվանդանոցներից մեկում հունիսի 5-ին, 68 տարեկան հասակում:
