Նախընտրելի
Վիետնամը հաջորդ ամսվանից սկսած կվերացնի մահապատիժը ութ հանցագործությունների համար, այդ թվում՝ յուրացման եւ կառավարությունը տապալելուն ուղղված գործունեության համար, չորեքշաբթի հայտնել է խորհրդարանը՝ 12 միլիարդ դոլարի խարդախության գործով անցնող մագնատին փրկելով մահապատժից, հաղորդել է NBC News-ը։
Երկրի օրենսդիր մարմինը՝ Ազգային ժողովը, չորեքշաբթի միաձայն վավերացրել է քրեական օրենսգրքի փոփոխությունը, որը վերացնում է մահապատիժն այս հանցագործությունների համար, նշվել է հայտարարությունում։
Այլ հանցագործությունների թվում, որոնց համար այլեւս մահապատիժ չի սահմանվի, վանդալիզմն է պետական սեփականության հանդեպ, կեղծ թմրանյութերի արտադրությունը, խաղաղությունը վտանգելը, նվաճողական պատերազմներ հրահրելը, լրտեսությունը եւ թմրանյութերի ապօրինի շրջանառությունը, հաղորդել է Վիետնամի պաշտոնական լրատվական գործակալությունը։
Այս հանցագործությունների համար առավելագույն պատիժն այժմ կլինի ցմահ բանտարկությունը, նշվել է հաղորդագրությունում: Նրանց պատիժը, ովքեր այս հանցագործությունների համար դատապարտվել են մահապատժի մինչեւ հուլիսի 1-ը, բայց դեռեւս մահապատժի չեն ենթարկվել, կփոխարինվի ցմահ բանտարկությամբ, նշվել է հաղորդագրությունում:
Նրանց թվում է անշարժ գույքի մագնատ Չիոնգ Մի Լանը՝ Van Thinh Phat Holdings Group-ի նախագահը, որն անցյալ տարի մահապատժի էր դատապարտվել մսխման մեղադրանքով։
