Նախընտրելի
Եվրամիությունը նախատեսում է 2025 թվականին Ուկրաինային 30,6 միլիարդ եվրո ֆինանսական աջակցություն հատկացնել։ Նախագծի մասին նշվում է ԵՄ գագաթնաժողովի եզրափակիչ հայտարարության մեջ, որն ընդունել են 27 անդամ երկրներից 26-ը։ Մեկ երկիր՝ Հունգարիան, որն ավելի վաղ նմանատիպ դիրքորոշում էր ցուցաբերել ուկրաինական հարցում, ձեռնպահ է մնացել քվեարկությունից։
Փաստաթղթում ընդգծվում է, որ ԵՄ-ն մտադիր է երկարաժամկետ հեռանկարում շարունակել Ուկրաինային կանոնավոր և կանխատեսելի աջակցությունը։ Օգնության ընդհանուր գումարից 3,5 միլիարդ եվրոն արդեն տրամադրվել է Ուկրաինայի համար նախատեսված հատուկ հիմնադրամի շրջանակում, իսկ ևս 7 միլիարդ եվրո հատկացվում է G7-ի նախաձեռնությամբ՝ ռուսական սառեցված ակտիվներից ստացված եկամուտներից։
Ուկրաինայում հակամարտության սկսվելուց ի վեր ԵՄ-ն և G7-ի երկրները սառեցրել են Ռուսաստանի Կենտրոնական բանկի մոտ 300 միլիարդ եվրոյի ակտիվներ։ Դրանցից ավելի քան 200 միլիարդ եվրոն գտնվում է Եվրոպական Միության տարածքում, հիմնականում բելգիական Euroclear քլիրինգային համակարգի հաշիվներում։
