Նախընտրելի
Ռուանդան եւ Կոնգոյի Դեմոկրատական Հանրապետությունը Վաշինգտոնում ԱՄՆ հովանու ներքո ստորագրել են խաղաղության համաձայնագիր, որը նպատակ ունի դադարեցնել Կոնգոյի Դեմոկրատական Հանրապետության արեւելքում հակամարտությունը, հաղորդել է BBC-ն:
ԱՄՆ-ը նաեւ Կոնգոյի Դեմոկրատական Հանրապետությունում հանքանյութեր արդյունահանելու իրավունք կստանա:
«Սա հույսի եւ հնարավորությունների, ներդաշնակության, բարգավաճման եւ խաղաղության նոր գլուխ է ամբողջ տարածաշրջանի համար։ Սա հրաշալի օր է»,- ասել է ԱՄՆ նախագահ Դոնալդ Թրամփը Սպիտակ տանը ստորագրող կողմերի ներկայացուցիչների հետ հանդիպման ժամանակ։
Ստորագրման պաշտոնական արարողությանը ներկա էին ԱՄՆ պետքարտուղար Մարկո Ռուբիոն եւ Կոնգոյի Դեմոկրատական Հանրապետության եւ Ռուանդայի արտաքին գործերի նախարարներ Թերեզա Կայիկվամբա Վագները եւ Օլիվիե Նդուհունգիրեհեն։
Խաղաղության համաձայնագրին շուտով հաջորդել է Փարիզի արձագանքը, Ֆրանսիայի նախագահ Էմանուել Մակրոնն այն անվանել է «պատմական քայլ»։
Խաղաղության համաձայնագիրը հիմնված է երկու աֆրիկյան երկրների կողմից 2025թ. ապրիլին հաստատված սկզբունքների հռչակագրի վրա: Վերջնական փաստաթղթում նշվել է, որ կողմերը պարտավորվում են «հարգել միմյանց տարածքային ամբողջականությունը» եւ դադարեցնել ռազմական գործողությունները Կոնգոյի Դեմոկրատական Հանրապետության արեւելքում:
