Նախընտրելի
Լեհաստանի նախկին նախագահ և «Солидарность» շարժման առաջնորդ Լեխ Վալենսան տեղափոխվել է հիվանդանոց։ 81-ամյա քաղաքական գործիչն անձամբ է հայտարարել իր հոսպիտալացման մասին՝ Facebook-ում գրառում անելով։
«Փառք Աստծո, կրկին հաջողվեց», - գրել է Վալենսան՝ հրապարակմանը կցելով լուսանկար, որում ինքը պառկած է հիվանդանոցային մահճակալին՝ միացված բժշկական սարքավորումներին և թթվածնային դիմակին։
Լեհական Interia պորտալի տվյալներով՝ հոսպիտալացումը կապված է պլանային բժշկական միջամտության հետ, որը ի սկզբանե պետք է կատարվեր ավելի ուշ, սակայն բժիշկները որոշել են չհետաձգել միջամտությունը։
Վալենսայի օգնական Մարեկ Կաչմարը, իր հերթին, հայտնել է, որ նախկին նախագահը շտապ վիրահատության է ենթարկվել։
«Նախագահի առողջական վիճակը լավ է։ Նա այժմ Վարշավայի հիվանդանոցներից մեկում է։ Նրան վիրահատել են, որը նախատեսված էր մեկ այլ ամսաթվի համար, սակայն այն հիմա կատարելու անհրաժեշտություն ի հայտ եկավ։ Նա այսօր հիվանդանոց չի լքի», - լրագրողներին պատմել է Կաչմարը։
Սակայն նա չի մանրամասնել, թե ինչպիսի վիրահատության է ենթարկվել Վալենսան։
Վալենսան վաղուց տառապում է շաքարախտից և սրտի աշխատանքին առնչվող խնդիրներ ունի։ 2008 թվականին նախկին նախագահը ԱՄՆ-ում ենթարկվել է սրտի խթանիչ-դեֆիբրիլյատորի իմպլանտացիայի վիրահատության։ Մի քանի տարի առաջ լարերից մեկը պոկվել է սրտի խթանիչից։ Այնուհետև, վիրահատությունից առաջ, Վալենսան հրաժեշտի նամակ է գրել իր մահվան դեպքում։ Վիրահատությունն, արդյունքում, հաջողությամբ է պսակվել։
