Նիգերիայի նախկին նախագահ Մուհամմադու Բուհարին, ով մահացել է 83 տարեկանում՝ Լոնդոնի հիվանդանոցում, կթաղվի իր հայրենի Դաուրա քաղաքում։ Այս մասին հայտնել է բրիտանական BBC հեռարձակող կորպորացիան։

Նրա խոսքով՝ Նիգերիայի նախկին առաջնորդի մարմինը, որը մահացել է հուլիսի 13-ին (կարճատև հիվանդությունից հետո)՝ հայրենիք կտեղափոխվի հուլիսի 14-ին։

Իսլամական հոգևորական Աբդուլահի Գարանգամավայի խոսքով՝ թեև Բուհարին նախկին նախագահ է, սակայն պետական հուղարկավորություն չի լինի։ Իսլամական ուսմունքների համաձայն՝ դա կլինի պարզ արարողություն, որը կանցկացվի հնարավորինս շուտ։ «Միակ բանը, որը կարող է խանգարել հուղարկավորությանը երկուշաբթի օրը, դա գիշերով մարմնի ժամանումն է, քանի որ իսլամը դատապարտում է գիշերային հուղարկավորությունները», - նշել է Գարանգամավան։ «Այդ դեպքում հուղարկավորության համար ընդունելի կլինի երեքշաբթի առավոտը»։

Մուհամմադու Բուհարին Նիգերիայի նախագահի պաշտոնը զբաղեցրել է 2015-2023 թվականներին։ Նրա կառավարման վերջին մի քանի տարիներին նա հաճախ է հիվանդացել, ինչի պատճառով երկար ժամանակ բացակայել է երկրից՝ բուժվելով Մեծ Բրիտանիայում։ Նախկին նախագահի մահվան կապակցությամբ երկրում հայտարարվել է յոթնօրյա սուգ և բոլոր պետական հիմնարկություններում իջեցվել են դրոշները։ Սպասվում է, որ Դաուրայում կայանալիք հուղարկավորությանը կմասնակցի երկրի գործող նախագահ Բոլա Թինուբուն։