Բանակցությունների նոր փուլ հնարավոր է միայն այն դեպքում, եթե մյուս կողմը պատրաստ լինի արդար միջուկային համաձայնագրի։ Այս մասին հայտարարել է Իրանի ԱԳ նախարար Արաղչին։

«Երեկ երեկոյան ես տեսակոնֆերանս եմ ունեցել եվրոպական երեք երկրների (E3) արտգործնախարարների և ԵՄ արտաքին հարաբերությունների գծով ներկայացուցչի հետ։ Ես հստակ արտահայտել եմ հետևյալ կետերը։

Հենց Միացյալ Նահանգներն են դուրս եկել 2015 թվականին ԵՄ-ի մասնակցությամբ երկու տարվա համակարգված ջանքերի արդյունքում ձեռք բերված համաձայնագրից, ոչ թե Իրանը. և հենց ԱՄՆ-ն է այս տարվա հունիսին լքել բանակցությունների սեղանը և դրա փոխարեն ընտրել ռազմական տարբերակը, ոչ թե Իրանը։

Բանակցությունների ցանկացած նոր փուլ հնարավոր կլինի միայն այն դեպքում, եթե մյուս կողմը պատրաստակամություն ցուցաբերի արդար, հավասարակշռված համաձայնագրի, որը հիմնված է փոխադարձ շահերի վրա։

Եթե Եվրոպական միությունը և եվրոպական երեք երկրները ցանկանում են կառուցողական դեր խաղալ, նրանք պետք է պատասխանատու գործեն և հրաժարվեն սպառնալիքների ու ճնշումների հնացած քաղաքականությունից, ներառյալ «Snapback» մեխանիզմը գործի դնելու սպառնալիքները, որը որևէ բարոյական կամ իրավական հիմք չունի»,- նշել է Արաղչին։