Նոր հետազոտությունը, որը հիմնված է հնագույն ԴՆԹ-ի վրա, ցույց է տվել, որ հայտնի «սառցե մարդը»՝ Էտցին, ծագումով տարբերվել է Ալպերում ավելի քան 5000 տարի առաջ ապրած իր ժամանակակիցներից։

Հետազոտության արդյունքները հրապարակվել են Nature Communications ամսագրում։

Իտալիայի Բոլցանո քաղաքի Մումիաների ուսումնասիրության ինստիտուտի գիտնականները վերլուծել են Տիրոլյան Ալպերում մ.թ.ա. 6400–1300 թվականներին ապրած 47 մարդու գենոմ, ներառյալ պղնձե դարաշրջանի 15 նոր նմուշ։

Պարզվել է, որ տարածաշրջանի հնագույն բնակիչների մեծ մասը ունեցել է բարձր՝ 80–90 տոկոսանոց, անատոլիական հողագործական ծագում և ցածր՝ որսորդ-հավաքչական բաղադրիչ։ Նրանց գենոմային կառուցվածքը բավականին միատարր է եղել, հատկապես հայրական գծով․ գրեթե բոլոր տղամարդիկ ունեցել են Y-քրոմոսոմ, որը տարածված է եղել նախապատմական Գերմանիայի և Ֆրանսիայի բնակչության շրջանում։

Սակայն Էտցին տարբերվել է։ Նրա հայրական գիծը եղել է հազվադեպ և ավելի լայն տարածում ունեցող, իսկ մայրական գիծը ընդհանրապես չի հայտնաբերվել որևէ այլ հնագույն կամ ժամանակակից նմուշում, ինչը կարող է վկայել այդ գծի անհետացման մասին։

Հետազոտողները նաև հաստատել են, որ թե՛ Էտցին, թե՛ նրա հարևանները ունեցել են մուգ մազեր և աչքեր, ինչպես նաև լակտոզի անհանդուրժողականություն։ Թեև գիտնականները չեն կարող հստակ նշել Էտցիի մշակութային պատկանելությունը, նրանք ենթադրում են, որ նա կարող էր լինել առանձին հողագործական խմբի ներկայացուցիչ, որը տարբերվել է Ալպերում ապրող մյուսներից։

Հետազոտությունը բաց է թողնում Էտցիի՝ նախապատմական Եվրոպայի ամենահանելուկային մարդկանցից մեկի, գենետիկ և մշակութային ծագման հարցը։