Իրանը հայտարարել է հարևան երկրներ երեք նոր երկաթուղային երթուղիներ գործարկելու ծրագրերի մասին՝ տարածաշրջանում երկաթուղային ուղևորափոխադրումները մեծացնելու նպատակով, հայտնում է Mehr-ը։

Իրանի ազգային երկաթուղային ընկերության (RAJA) գլխավոր տնօրեն Ջաբար Ալի Զաքերին, որը նաև ճանապարհների և քաղաքաշինության փոխնախարարն է, շաբաթ օրը հայտարարել է, որ նոր երկաթուղային երթուղիները կներառեն ուղղություններ դեպի Թուրքիա, Աֆղանստան և Թուրքմենստան, հայտնում է Press TV-ն։

Զաքերին ասել է, որ RAJA-ն նախատեսում է ուղիղ երկաթուղային ուղևորափոխադրումներ սկսել Թեհրանից դեպի Թուրքիայի մայրաքաղաք Անկարա՝ ավելացնելով, որ այս ծառայությունը կդառնա Թեհրանի և թուրքական Վան քաղաքի միջև գործող երթուղու շարունակությունը։

Նա ասել է, որ Իրանի և Թուրքիայի իշխանությունները քննարկում են նոր երթուղու հետ կապված ֆինանսական հարցերը, ներառյալ սակագները՝ հավելելով, որ ակնկալում է, որ այս երթուղով ուղևորությունները կսկսվեն առաջիկա երկու ամսվա ընթացքում։

Պաշտոնյան հայտնել է, որ մեկ այլ նոր երթուղի կընդգրկի ուղևորափոխադրումներ Իրանի Թեհրան և Մաշհադ քաղաքների և աֆղանական Հերաթ քաղաքի միջև՝ ավելացնելով, որ ուղևորությունները կսկսվեն, հենց որ Իրանն ու Աֆղանստանը լուծեն ճամփորդական փաստաթղթերի հետ կապված հարցերը։

Զաքերին ասել է, որ երթուղին թույլ կտա առանց տեղափոխման Իրանից հասնել Հերաթի մոտ գտնվող Ռոզանակ՝ հավելելով, որ ուղևորությունը կշարունակվի մինչև Հերաթ, հենց որ իրանցի կապալառուներն ավարտեն քաղաքի և Ռոզանակի միջև 70 կիլոմետրանոց երկաթուղային հաղորդակցության կառուցումը։ Նա ասել է, որ Raja-ն նախատեսում է նաև ուղևորատար երթուղի գործարկել Իրանի Մաշհադ քաղաքից դեպի Թուրքմենստանի Մարվ քաղաքը։

Raja-ի ղեկավարը հայտարարել է, որ այս երթուղին Իրանին թույլ կտա ամրապնդել իր տնտեսական և առևտրային հարաբերությունները Կենտրոնական Ասիայի երկրների հետ, քանի որ այն կարող է հեշտացնել իրանցի ուղևորների մուտքը Ուզբեկստան և Տաջիկստան, հենց որ այն ամբողջ հզորությամբ սկսի գործել։