Եմենի «Անսար Ալլահ» շարժման հուսիները մտադիր են իրենց զենքի հասանելիության գոտում հարվածներ հասցնել Իսրայելի նավահանգիստների հետ աշխատող բոլոր ընկերությունների նավերին։ Այս մասին հայտարարել է ապստամբների կողմից ձևավորված զինված ուժերի ներկայացուցիչ Յահյա Սարիան։

«Եմենի զինված ուժերը որոշում են կայացրել ուժեղացնել իրենց ռազմական գործողությունները՝ [պաղեստինցիներին] աջակցելու նպատակով և սկսել հակառակորդի ծովային շրջափակման չորրորդ փուլի իրականացումը, որը նախատեսում է հարվածներ հասցնել ցանկացած ընկերության բոլոր նավերին, որոնք աշխատում են իսրայելական նավահանգիստների հետ, անկախ նրանց ազգային պատկանելությունից և զինված ուժերի հասանելիության սահմաններում գտնվելու վայրից», - ասել է Սարիան, ում ուղերձը հեռարձակել է հուսիներին պատկանող Al Masirah հեռուստաալիքը։

Անսար Ալլահի զինվորական ներկայացուցիչը դիմել է նավագնացային ընկերություններին և խորհուրդ է տվել նրանց «դադարեցնել համագործակցությունը իսրայելական նավահանգիստների հետ»՝ զգուշացնելով, որ «հակառակ դեպքում նրանց նավերը, անկախ նպատակակետից, հարձակման կենթարկվեն հրթիռների և անօդաչու սարքերի հասանելիության շրջանակներում»։ Սարիան կոչ է արել այն երկրներին, որոնք ցանկանում են խուսափել լարվածության սրացումից՝ ճնշում գործադրել Իսրայելի վրա, որպեսզի վերջինս դադարեցնի գործողությունը Գազայի հատվածում և վերացնի պաղեստինյան անկլավի շրջափակումը։

2023 թվականին Գազայի հատվածում հակամարտության սրացումից հետո հուսիները նախազգուշացրել են, որ կհրթիռակոծեն Իսրայելի տարածքը և չեն թույլատրի Իսրայելին առնչվող նավերին անցնել Կարմիր ծովով և Բաբ էլ Մանդեբի նեղուցով։ Հարձակումները դադարել են 2025 թվականի հունվարի կեսերին, երբ Պաղեստինյան գոտում հրադադար է հաստատվել։ Սակայն մարտի սկզբին հրադադարը ձախողվել է և հուսիները հայտարարել են Կարմիր ծովում Իսրայելի նավերի դեմ հարվածների վերավերսկսման մասին։ Այնուհետև նրանք նորից սկսել են հարձակվել Իսրայելի տարածքում գտնվող օբյեկտների վրա, ներառյալ Բեն Գուրիոն օդանավակայանը։